प्रभात वृत्तसेवा
पुणे – जगातील अस्थिर वातावरणात सोने हीच सुरक्षित आणि भरवशाची गुंतवणूक मानली जात आहे. सोन्याच्या किमती वाढल्या असूनही भविष्यात आणखी वाढ होण्याच्या शक्‍यतेने दसऱ्याला सोन्याला चांगलीच मागणी असणार आहे. या पार्श्‍वभूमीवर सराफ बाजारपेठ सज्ज झाली आहे. दसऱ्यानिमित्त दागिन्यांच्या आगाऊ ऑर्डरही आल्याचेही सांगण्यात येत आहे. वर्षभरात सोन्याच्या खरेदीवर ६० टक्के परतावा मिळाला आहे. त्यामुळे सोन्यात गुंतवणूक कराच, असे आवाहन सराफ व्यावसायिकांनी केले आहे

वास्तुपाल रांका (रांका ज्वेलर्स) – भावात आणखी वाढ होण्याच्या शक्यतेने सोन्याला मागणी आहे. वेढणी आणि सोन्याच्या नाण्याला मागणी आहे. चांदीलाही चांगली आहे. कमी वजनाच्या दागिन्यांची खरेदी करण्यास पसंती मिळत आहे. दरवाढीच्या शक्यतेने लग्नासाठी दागिन्यांची खरेदी करण्यात येत आहे. दिवाळीपर्यंत सोन्याच्या दरात वाढ होण्याचा अंदाज आहे. वर्षभरात सोन्याने ६० टक्के, तर चांदीने १०० टक्के परतावा दिला आहे. त्यामुळे सोन्यात गुंतवणूक करण्यास प्राधान्य दिले पाहिजे.

सिद्धार्थ शहा (चंदुकाका सराफ ज्वेल्स) – सोन्याचा भाव वाढला आहे. लग्न अथवा इतर कार्यासाठी मोठी खरेदी करायची आहे, त्यांच्याकडून खरेदी होत आहे. पुढे भावात आणखी वाढ होऊ नये, यासाठी ही खरेदी होत आहे. दसरा त्याचे निमित्त ठरत आहे. महिनाभरात सोन्याच्या भावात २० टक्के वाढ झाली आहे. एवढा परतावा म्युच्युअल फंड, बँकेतून मिळत नाही. तज्ज्ञांच्या मते यातील परतावा वाढणार आहे. त्यामुळे सोन्यातील गुंतवणूक योग्यच आहे.

अतुल अष्टेकर (कृष्णा राजाराम अष्टेकर ज्वेलर्स) – सोन्याचे भाव वाढतच चालले आहेत. अस्थिर जागतिक परिस्थिती पाहता सोन्याचे अभाव कमी होण्याची शक्यता नाही, असे तज्ज्ञांचे मत आहे. अमेरिकेच्या धोरणामुळे जगात डॉलरची मागणी कमी होत आहे. डॉलरची मागणी कमी झाल्यास सोन्याची वाढत असते. परिणामी, भावात तेजी राहणार आहे. सध्या मोठी खरेदी होत नाही. मात्र, लोक मुहूर्ताची संधी सोडत नाहीत. मुहूर्तावर वेढणी, सोन्याच्या नाण्याची खरेदी होत आहे. मुहूर्ताच्या अनुषंगाने थोडी का होईना सोन्यात गुंतवणूक करणे योग्य ठरेल, असे मला वाटते.

अजितकाका गाडगीळ (पु. ना. गाडगीळ ऍण्ड सन्स) – सोन्याच्या भावात दिवसेंदिवस वाढ होत चालली आहे. सोन्याच्या खरेदीतून चांगला परतावा मिळत आहे. त्यामुळे गुंतवणूक म्हणून सोने खरेदीकडे लोकांचा कल वाढला आहे. मुहूर्तावर सोने खरेदी केली जाते. अर्धा, एक ग्रॅमपासून सोने खरेदी केली जाते. त्यानुसार उद्या दसऱ्याला मागणी असणार आहे. आता १४ आणि १८ कॅरेटचे दागिनेही बाजारात उपलब्ध आहेत. लोकांकडून त्यालाही मागणी वाढत आहे.