नवी दिल्ली : दिल्ली विधानसभा निवडणुकीत भाजपचा विजय सुनिश्चित करण्यासाठी स्टार प्रचारक राजस्थानचे मुख्यमंत्री भजनलाल शर्मा दिल्लीत पोहोचले आहेत. द्वारका विधानसभा मतदारसंघातील भाजप उमेदवार प्रद्युम्न सिंह राजपूत यांच्या समर्थनार्थ आयोजित जाहीर सभेला मुख्यमंत्री भजन लाल यांनी संबोधित केले. यावेळी त्यांनी सांगितले की, आम आदमी पक्ष भ्रष्टाचाराची जननी असलेल्या काँग्रेसच्या पावलावर पाऊल ठेवून चालत आहे आणि त्यांचे लोक भ्रष्टाचारात बुडाले आहेत. थोडक्यात दिल्लीची अवस्था ही दिव्याखाली अंधारासारखी झाली आहे.

भजन लाल म्हणाले की, आपचे लोक स्वतःला प्रामाणिकपणाचे संस्थापक म्हणवायचे. पण सत्तेत आल्यानंतर ते भ्रष्टाचारात बुडाले आणि आप देखील काँग्रेसच्या पावलावर पाऊल ठेवून चालत आहे. हे लोक जाती आणि धर्माबद्दल बोलतात, पण भाजप पंडित दीनदयाळ उपाध्याय आणि डॉ. भीमराव आंबेडकरांच्या तत्वांवर काम करते. सबका साथ, सबका विकास या मार्गावर चालते.

आम आदमी पक्षाने लोकांना खोटी स्वप्ने दाखवली आणि ते सत्तेत आले. मात्र त्यांनी दिल्लीत भ्रष्टाचाराचे नवे मॉडेल दिले. वर्गखोल्या बांधण्याच्या नावाखाली १३०० कोटी रुपयांचा घोटाळा केला. आरोग्य क्षेत्रातही ६५ हजार बनावट लॅब चाचण्या करून ३०० कोटी रुपयांचा घोटाळा करण्यात आला. याशिवाय त्यांनी २,८०० कोटी रुपयांचा दारू घोटाळाही केला. घोटाळ्यांमुळे त्यांचे आमदार आणि मंत्रीच नव्हे तर मुख्यमंत्रीही तुरुंगात गेले.

पंतप्रधान मोदींनी सर्व वर्गांना आदर दिला
मुख्यमंत्री भजन लाल म्हणाले की, देशाचे पंतप्रधान नरेंद्र मोदी यांनी युवक, महिला, शेतकरी आणि कामगारांना पुढे नेण्याचे आणि त्यांचा आदर करण्याचे काम केले आहे. त्यांच्या नेतृत्वाखाली, २०१४ नंतर, आपण देशात गरिबांचे कल्याण, देशाचा विकास, दहशतवाद-नक्षलवादाचे उच्चाटन आणि जगात भारताचा वाढता अभिमान असे अनेक बदल पाहिले आहेत.

राजस्थान, हरियाणा आणि महाराष्ट्र सारख्या राज्यांमध्ये भाजपची डबल इंजिन सरकारे त्यांच्या जाहीरनाम्यांमध्ये दिलेली आश्वासने पूर्ण करून जनहित आणि विकासासाठी सतत काम करत आहेत. ते म्हणाले की, देशाची राजधानी असूनही दिल्लीची अवस्था वाईट आहे. ही परिस्थिती दिव्याखाली अंधार सारखी आहे.