Delhi Jal Board STP Scam: आम आदमी पक्षाचे (AAP) नेते आणि दिल्लीचे माजी मंत्री सत्येंद्र जैन यांना दिल्ली जल बोर्डाच्या (DJB) कथित सीवेज ट्रीटमेंट प्लांट (STP) टेंडर घोटाळा प्रकरणात मोठा दिलासा मिळाला आहे.

राऊज अव्हेन्यू कोर्टाने  आज जैन यांना जामीन मंजूर केला. जैन यांना दिल्ली सरकारच्या अँटी करप्शन ब्रँचने (ACB) या प्रकरणात अटक केली होती.

काय आहे संपूर्ण प्रकरण? Delhi Jal Board STP Scam:

दिल्ली जल बोर्डाच्या अंतर्गत दिल्लीतील १० सीवेज ट्रीटमेंट प्लांट्सच्या क्षमतेत वाढ आणि आधुनिकीकरणासाठी** सुमारे ₹१,९४३ कोटींच्या टेंडर प्रक्रियेत कथित अनियमितत* झाल्याचा आरोप आहे. ACBच्या तपासानुसार, टेंडरच्या अटी आणि तांत्रिक निकषांमध्ये अशा प्रकारे बदल करण्यात आले की, विशिष्ट खासगी कंपनीला कंत्राट मिळण्याचा फायदा झाला.

तपास यंत्रणेचा आरोप आहे की, टेंडरमध्ये काही प्रतिबंधात्मक तांत्रिक अटी घालण्यात आल्या होत्या. त्यामुळे स्पर्धा कमी झाली आणि एका विशिष्ट तंत्रज्ञान पुरवठादाराला फायदा मिळाला. प्रस्तावित पायलट स्टडी न करता टेंडरमध्ये तंत्रज्ञान आणि वापरल्या जाणाऱ्या माध्यमासंदर्भात विशिष्ट अटी समाविष्ट करण्यात आल्याचा आरोपही ACBने केला आहे.

सत्येंद्र जैन यांच्यावर काय आरोप? 

ACBने आरोप केला आहे की, सत्येंद्र जैन यांनी टेंडर प्रक्रियेत महत्त्वाची भूमिका बजावली आणि विशिष्ट कंपनीला फायदा होईल अशा पद्धतीने प्रक्रिया प्रभावित करण्यात आली. तपास यंत्रणेने जैन यांच्यासह तत्कालीन दिल्ली जल बोर्डाचे CEO उदित प्रकाश राय आणि अन्य आरोपींवर कटकारस्थानात सहभागी असल्याचा आरोप केला आहे.

तपासादरम्यान आरोपींमधील काही संदेश आणि पैशांच्या कथित व्यवहारांचाही तपास करण्यात आला. इंडियन एक्स्प्रेसच्या वृत्तानुसार, ACBचा दावा आहे की टेंडरच्या अटी व कामाची व्याप्ती बदलून कंत्राटाची किंमत वाढवण्यात आली आणि त्यातून कंत्राटदार कंपनीला फायदा मिळवून देण्यात आला.
१८ ऑगस्टला झाली होती अटक

ACBने १८ ऑगस्ट २०२६ रोजी सत्येंद्र जैन यांना अटक केली होती. त्यांच्यासोबत दिल्ली जल बोर्डाचे माजी CEO उदित प्रकाश राय आणि इतर आरोपींनाही अटक करण्यात आली. दुसऱ्या दिवशी न्यायालयाने जैन आणि अन्य चार आरोपींना १४ दिवसांची न्यायालयीन कोठडी सुनावली होती. जैन यांनी आपल्या अटकेला राजकीय सूड असल्याचा आरोप केला होता.

जैन यांच्या वकिलांनी न्यायालयात ACBने तब्बल २७ महिन्यांनंतर अटक केल्याचा मुद्दा** उपस्थित केला. जैन तपासात यापूर्वी सहकार्य करत होते, त्यामुळे अटकेची गरज नव्हती, असा युक्तिवाद बचाव पक्षाने केला होता. मात्र, न्यायालयाने सुरुवातीला अटक बेकायदेशीर असल्याची त्यांची मागणी फेटाळून लावली होती.

जामिनावर ACBचा विरोध Delhi Jal Board STP Scam:

जैन यांच्या जामीन अर्जाला ACBने जोरदार विरोध केला होता. जैन हे कथित कटाचा महत्त्वाचा भाग असल्याचा आणि त्यांना जामीन मिळाल्यास ते साक्षीदारांवर प्रभाव टाकू शकतात किंवा पुराव्यांमध्ये हस्तक्षेप करू शकतात, असा युक्तिवाद तपास यंत्रणेने केला होता.

२५ ऑगस्ट रोजी राऊज अव्हेन्यू कोर्टाने जैन यांच्या जामीन अर्जावरील सुनावणी पूर्ण करून ३ सप्टेंबरला निर्णय देण्याचे निश्चित केले होते.  आज न्यायालयाने जैन यांना जामीन दिल्याने त्यांना या प्रकरणात तात्पुरता मोठा दिलासा मिळाला आहे. मात्र, जामीन मिळणे म्हणजे आरोपातून निर्दोष मुक्तता झालेली नाही. दिल्ली जल बोर्डाच्या STP टेंडर प्रक्रियेतील कथित गैरव्यवहाराचा तपास आणि त्यानंतरची न्यायालयीन प्रक्रिया पुढे सुरू राहणार आहे.