CA Result 2026 : सीए इंटरमीडिएटच्या सप्टेंबर २०२६ परीक्षेत नाशिकच्या साक्षी चांडकने ६०० पैकी ५०२ गुण मिळवत देशात संयुक्तपणे प्रथम क्रमांक पटकावला. मुंबईचा नील राजेश शाह यानेही ५०२ गुण मिळवत साक्षीसोबत AIR 1 मिळवला. दोघांची गुणांची टक्केवारी ८३.६७ टक्के आहे. साक्षीने या यशाचे श्रेय आई-वडिलांना, शिक्षकांना आणि सातत्याने केलेल्या अभ्यासाला दिले.

साक्षी मूळची नाशिक जिल्ह्यातील इगतपुरीची आहे. दहावीच्या CBSE परीक्षेत तिने ९७.४ टक्के गुण मिळवत शाळेत प्रथम क्रमांक मिळवला होता. तालुक्यात तिचा दुसरा क्रमांक होता. बारावीच्या महाराष्ट्र बोर्डाच्या परीक्षेत तिने ९४.३३ टक्के गुण मिळवत नाशिकमध्ये चौथा क्रमांक मिळवला.

सध्या साक्षी पुणे विद्यापीठातून बीकॉमचे शिक्षण घेत असून त्यासोबतच चार्टर्ड अकाउंटन्सीचे शिक्षण घेत आहे. वित्त, गणित आणि कर आकारणी या विषयांमध्ये तिला विशेष रस आहे. अभ्यासासोबतच तिला चित्र काढणे, सुडोकू सोडवणे आणि निसर्गभ्रमंती आवडते.

दहावीनंतर करिअरचा निर्णय घेण्यासाठी पुरेसा अनुभव नसल्याने तिने सीएचा पर्याय निवडला. या क्षेत्रात करिअरच्या अनेक संधी असल्याने सीए करण्याचा निर्णय घेतल्याचे तिने सांगितले. सीए इंटरमीडिएटची तयारी तिने जुलै २०२५पासून सुरू केली.

साक्षी पहाटे ५ वाजता उठत असे आणि रात्री साडेदहा वाजता झोपत असे. दररोज सरासरी १२ तास अभ्यास करत होती. परीक्षा जवळ आल्यावर अभ्यासाचा कालावधी १४ तासांपर्यंत वाढला. अभ्यासादरम्यान नाश्ता, जेवण आणि इतर कामांसाठी छोटे ब्रेक ती घेत होती.

प्रत्येक विषयासाठी तिची वेगळी अभ्यासपद्धत होती. स्ट्रॅटेजिक मॅनेजमेंट हा विषय तिला कठीण वाटत असल्याने तिने त्याची वारंवार उजळणी केली. ऑडिट विषयाची चार वेळा टप्प्याटप्प्याने उजळणी केली, तर टॅक्स विषयासाठी सुरुवातीपासूनच भरपूर सराव केला.

परीक्षेपूर्वीच्या काळात तिला तणाव आणि आत्मविश्वासाच्या कमतरतेचा सामना करावा लागला. मात्र, आई-वडील आणि शिक्षकांचा पाठिंबा, स्वतःच्या मेहनतीवरील विश्वास आणि सातत्यामुळे तिने मानसिक दबावावर मात केली.

अभ्यासात साक्षीने कृत्रिम बुद्धिमत्ता म्हणजेच AIचीही मदत घेतली. काही संकल्पना अधिक स्पष्टपणे समजून घेण्यासाठी आणि काही कायदेशीर प्रकरणे समजण्यासाठी तिने AIचा वापर केला. मात्र, तिच्या मते सातत्यपूर्ण अभ्यास, मेहनत आणि कुटुंबाचा पाठिंबा हेच तिच्या यशाचे मुख्य आधार आहेत.

निकालात AIR 1 मिळाल्याचे समजताच साक्षी भावूक झाली. अनेक दिवसांची मेहनत, पहाटेचा अभ्यास आणि जागून केलेली तयारी याचे समाधान मिळाल्याची भावना तिने व्यक्त केली. पुढे बीकॉम आणि सीएचे शिक्षण सुरू ठेवण्याचा तिचा मानस आहे.