नवी दिल्ली : दिल्लीतील पतियाळा हाऊस न्यायालयाने शुक्रवारी चैतन्यानंद सरस्वती यांचा अटकपूर्व जामीन अर्ज फेटाळला. त्यांच्यावर श्रींगेरी शारदा पीठाशी संबंधित कथित आर्थिक अनियमिततेच्या प्रकरणात गुन्हा दाखल आहे. अतिरिक्त सत्र न्यायाधीश डॉ. हरदीप कौर यांनी आरोपी, तक्रारकर्ता आणि दिल्ली पोलिसांच्या युक्तिवादानंतर हा निर्णय दिला.

चैतन्यानंद यांच्यावर कोट्यवधी रुपयांचा गैरव्यवहार, फसवणूक, विश्वासघात आणि श्री शारदा इन्स्टिट्यूट ऑफ इंडियन मॅनेजमेंट रिसर्चच्या निधीचा अपहार केल्याचा आरोप आहे. त्यांनी सहकाऱ्यांसह बनावट ट्रस्ट स्थापन केला, बनावट कागदपत्रे तयार केली आणि वसंत कुंज येथील जमीन बेकायदेशीरपणे भाड्याने दिल्याचा आरोप आहे. दिल्ली पोलिसांनी सांगितले की, त्यांनी सुमारे ४० कोटी रुपये हडप केले आणि वेगवेगळ्या नावांनी बँक खाती उघडली. याशिवाय, त्यांच्याकडे दोन पासपोर्ट, दोन पॅन कार्ड आणि लक्झरी कारवर बनावट नोंदणी क्रमांक असल्याचेही उघड झाले आहे. गुन्हा दाखल झाल्यानंतर त्यांनी ५०-५५ लाख रुपये काढल्याचा दावा आहे.

न्यायालयाने सांगितले की, या प्रकरणातील गुन्हे गंभीर असून तपास प्राथमिक अवस्थेत आहे. चैतन्यानंद यांनी पंतप्रधान सल्लागार परिषदेचे सदस्य आणि संयुक्त राष्ट्रांचे प्रतिनिधी असल्याचा खोटा दावा केल्याचेही पोलिसांनी सांगितले. साक्षीदारांवर दबाव आणि पुरावे नष्ट होण्याचा धोका लक्षात घेता, तपासासाठी त्यांची कोठडी आवश्यक असल्याचे न्यायालयाने नमूद केले. त्यामुळे जामीन अर्ज फेटाळण्यात आला. याप्रकरणी वरिष्ठ वकील अजय बर्मन यांनी आरोपीची बाजू मांडली, तर रुशब अग्रवाल आणि कुमार वैभव यांनी तक्रारकर्त्यांचे प्रतिनिधित्व केले.