Abhijit Dipke : कॉकरोच जनता पार्टी (CJP) चे संस्थापक अभिजीत दीपके यांनी दिल्लीतील जंतर-मंतर येथे आंदोलन छेडले असताना दुसरीकडे छत्रपती संभाजीनगरातील त्यांच्या निवासस्थानाबाहेर मोठा पोलीस बंदोबस्त तैनात करण्यात आला होता. नीट पेपरफुटी प्रकरणावरून केंद्रीय शिक्षणमंत्र्यांच्या राजीनाम्याची मागणी करत करण्यात आलेल्या आंदोलनाच्या पार्श्वभूमीवर पोलिसांनी विशेष खबरदारी घेतली. (Abhijit Dipke)

अमेरिकेतून भारतात परतल्यानंतर अभिजीत दीपके यांनी दिल्लीत जंतर-मंतर येथे आंदोलन सुरू केले. या आंदोलनाला विविध स्तरांतून प्रतिसाद मिळत असतानाच त्यांच्या कुटुंबीयांच्या सुरक्षेच्या दृष्टीने संभाजीनगरच्या वाळूज परिसरातील निवासस्थानावर पोलिसांनी लक्ष केंद्रित केले. (Abhijit Dipke)

या पार्श्वभूमीवर गुन्हे शाखेचे पोलीस उपायुक्त प्रशांत मोहिते, विशेष शाखेचे पोलीस निरीक्षक अविनाश आघाव, वाळूज एमआयडीसी पोलीस ठाण्याचे निरीक्षक रामेश्वर गाडे यांच्यासह अनेक वरिष्ठ अधिकाऱ्यांनी परिसराची पाहणी केली. सुरक्षा व्यवस्थेचा आढावा घेत आवश्यक सूचना देण्यात आल्या. (Abhijit Dipke)

अभिजीत दीपके यांच्या आंदोलनामुळे कोणताही अनुचित प्रकार घडू नये, तसेच कायदा व सुव्यवस्था अबाधित राहावी यासाठी पोलीस प्रशासन सतर्क असून परिस्थितीवर बारकाईने लक्ष ठेवले जात असल्याची माहिती सूत्रांनी दिली. (Abhijit Dipke)

दरम्यान, दिल्लीतील जंतर-मंतर येथे सकाळी 10.30 वाजता सुरू झालेले आंदोलन दुपारी साडेतीन वाजता संपुष्टात आले. आंदोलनादरम्यान सामाजिक कार्यकर्ते सोनम वांगचूक यांनी उपस्थितांना मार्गदर्शन केले. त्यानंतर अभिजीत दीपके यांनी भाषण करत आंदोलनाची सांगता जाहीर केली. (Abhijit Dipke)

आंदोलनकर्त्यांनी केंद्रीय शिक्षणमंत्र्यांनी सायंकाळी 5 वाजेपर्यंत राजीनामा द्यावा, अशी मागणी केली आहे. मागणी मान्य न झाल्यास पुढील आठवड्यात देशातील विविध शहरांमध्ये आंदोलनाची व्याप्ती वाढविण्याचा इशाराही देण्यात आला आहे. (Abhijit Dipke)