Deep Dasgupta Statement IND vs ENG T20I Series Loss 2026 : इंग्लंड दौऱ्यावरील पाच सामन्यांच्या टी-२० मालिकेत मिळालेल्या ४-० अशा लाजिरवाण्या पराभवानंतर भारतीय क्रिकेट संघावर चोहोबाजूंनी टीका होत आहे. भारताचे माजी यष्टीरक्षक-फलंदाज दीप दासगुप्ता यांनी यजमान इंग्लंडच्या रणनीतीचे कौतुक करतानाच, भारतीय संघाच्या सुमार कामगिरीवर आणि अजब निर्णयांवर तीव्र शब्दांत आक्षेप घेतला आहे. मार्च २०२६ मध्ये ऐतिहासिक टी-२० वर्ल्ड कप जिंकल्यापासून टीम इंडियाचा आलेख वेगाने खाली घसरला असून, भारताने आपल्या गेल्या ७ आंतरराष्ट्रीय सामन्यांपैकी तब्बल ६ सामने गमावले आहेत.

गंभीर आणि श्रेयस अय्यरचा थिंकटँक निशाण्यावर!

कर्णधार श्रेयस अय्यर आणि मुख्य प्रशिक्षक गौतम गंभीर यांच्या नेतृत्वाखालील रणनीतीवर तोफ डागताना दीप दासगुप्ता म्हणाले, “या मालिकेत इंग्लंड संघ रणनीतीच्या बाबतीत आपल्या खूप पुढे होता. भारतीय संघ व्यवस्थापनाचे काही निर्णय आणि योजना मला अजिबात समजल्या नाहीत. मैदानावर भारतीय खेळाडूंचे प्रदर्शन अत्यंत सुमार आणि दर्जाहीन होते; मग ती खराब कॅचिंग असो वा सुमार क्षेत्ररक्षण. भारतासाठी ही मालिका विसरण्यासारखी असली, तरी यातून खेळाडूंना मोठा धडा घ्यावा लागेल. संघात स्पष्टपणे अनुभवाची कमतरता जाणवत होती.”

३ खेळाडूंचे पदार्पण; पण हाती काहीच नाही!

या मालिकेत भारताने वैभव सूर्यवंशी, प्रिन्स यादव आणि सूर्यांश शेडगे या तीन युवा खेळाडूंना आंतरराष्ट्रीय पदार्पणाची संधी दिली. मात्र, दासगुप्ता यांच्या मते यामुळे भारताच्या हाती काहीच लागले नाही. “एखाद-दुसरी खेळी वगळता, भविष्याच्या दृष्टीने या मालिकेतून भारतासाठी एकही सकारात्मक गोष्ट समोर आलेली नाही. हा अत्यंत निराशाजनक पराभव असून आता निवडकर्त्यांना नव्या दृष्टीने विचार करावा लागेल,” असे त्यांनी स्पष्ट केले.

हेही वाचा – India Injury Blows : टीम इंडियाला डबल झटका! इंग्लंडविरुद्धच्या वनडे मालिकेपूर्वी ‘हे’ दोन हुकमी एक्के दुखापतीमुळे बाहेर

बुमराहशिवाय गोलंदाजी ठरतेय ‘फ्लॉप’!

जसप्रीत बुमराहच्या गैरहजेरीत भारतीय गोलंदाजी किती कमकुवत आहे, यावर बोट ठेवत दासगुप्ता म्हणाले की, अर्शदीप सिंगच्या नेतृत्वाखालील या आक्रमणात मधल्या षटकांमध्ये बळी घेणाऱ्या गोलंदाजाची तीव्र कमतरता जाणवली. सुरुवातीला विकेट घेण्यासाठी भारताकडे बुमराहसारखा हुकमी एक्का आहे, परंतु मधल्या षटकांमध्ये भागीदारी तोडणारे दर्जेदार गोलंदाज भारताला शोधावेच लागतील. २०२७ मध्ये होणाऱ्या ५० षटकांच्या वनडे वर्ल्ड कपचा विचार करून कदाचित संघ व्यवस्थापनाने टी-२० मध्ये हे नवे प्रयोग केले असावेत, असा अंदाजही त्यांनी शेवटी व्यक्त केला.