David Warner Drink Driving Case Sydney Court Fines 1500 Australian Dollars : ऑस्ट्रेलियाचा माजी धडाकेबाज सलामीवीर डेव्हिड वॉर्नर (David Warner) पुन्हा एकदा वादाच्या भोवऱ्यात सापडला आहे. मद्यधुंद अवस्थेत भरधाव गाडी चालवल्याप्रकरणी (Drink and Drive) सिडनीच्या न्यायालयाने त्याला दोषी ठरवले आहे. न्यायालयाने वॉर्नरला १,५०० ऑस्ट्रेलियन डॉलर्स (सुमारे १ लाख भारतीय रुपये) इतका दंड ठोठावला आहे. या वादग्रस्त प्रकरणामुळे आता वॉर्नरकडून ऑस्ट्रेलियाच्या प्रतिष्ठित बिग बॅश लीगमधील (BBL) सिडनी थंडर संघाचे कर्णधारपदही काढून घेतले जाण्याची दाट शक्यता निर्माण झाली आहे.

पोलिसांना चकवा देण्यासाठी बदलली होती ड्रायव्हिंग सीट –

मिळालेल्या माहितीनुसार, ५ एप्रिल रोजी ‘ईस्टर संडे’च्या दिवशी सिडनी पोलिसांनी रँडम ब्रेथ टेस्टदरम्यान (Random Breath Test) वॉर्नरची गाडी अडवली. पोलिसांना समोर पाहताच कारवाईपासून वाचण्यासाठी वॉर्नरने तपासणीच्या काही अंतरावरच गाडी थांबवून सोबत बसलेल्या एका महिला प्रवाशासोबत स्वतःची ड्रायव्हिंग सीट बदलून घेतली. मात्र, पोलिसांच्या सतर्कतेमुळे त्याचा हा प्रयत्न फसला. त्यानंतर वॉर्नरने पोलिसांना सहकार्य केले. तपासणी केली असता वॉर्नरच्या शरीरात मद्याचे प्रमाण कायदेशीर मर्यादेपेक्षा दोन पटीने जास्त असल्याचे स्पष्ट झाले.

कोर्टात कबूल केला गुन्हा; ठोठावला आर्थिक दंड!

David Warner has been found guilty in a drink-driving case by the Waverley Local Court in Sydney. The court imposed a fine of A$1,500 on Warner. The news has come as a shock to his fans.

Full Details : https://t.co/ckMoxdObPj#DavidWarner #Cricket pic.twitter.com/6BNA6ROSy9

— Venky. (@Cric_Venky) August 19, 2026

सिडनी न्यायालयात झालेल्या सुनावणीदरम्यान डेव्हिड वॉर्नरने आपला गुन्हा मान्य केला. न्यायालयाने त्याच्यावर १ लाख रुपयांचा दंड ठोठावत हे प्रकरण निकाली काढले. एका आंतरराष्ट्रीय स्तरावर खेळलेल्या स्टार खेळाडूने अशा प्रकारे मद्यधुंद अवस्थेत वाहन चालवल्याने क्रीडा जगतातून तीव्र नाराजी व्यक्त होत आहे.

हेही वाचा – ICC Test Rankings : आयसीसी कसोटी क्रमवारीत मोठी उलथापालथ! ट्रॅव्हिस हेडची बादशाही संपली; ‘हा’ खेळाडू बनला नंबर १ फलंदाज

सिडनी थंडरच्या कर्णधारपदावर लटकली टांगती तलवार!

या कारवाईनंतर बिग बॅश लीगमध्ये सिडनी थंडर संघाचे नेतृत्व करणाऱ्या वॉर्नरच्या कर्णधारपदावर प्रश्नचिन्ह उभे राहिले आहे. सिडनी थंडर हा संघ सिडनी सिक्सर्स आणि शेफील्ड शिल्डच्या एनएसडब्ल्यू ब्लूज (NSW Blues) संघासह मिळून ‘ड्रिंक अँड ड्राईव्ह’ विरोधातील जनजागृती मोहिमेचा अधिकृत सदस्य आहे. अशा स्थितीत खुद्द कर्णधारच मद्यपान प्रकरणात दोषी ठरल्याने नैतिक जबाबदारी म्हणून वॉर्नरची कर्णधारपदावरून गच्छंती जवळपास निश्चित मानली जात आहे.