ICC Test Rankings : आयसीसी कसोटी क्रमवारीत मोठी उलथापालथ! ट्रॅव्हिस हेडची बादशाही संपली; ‘हा’ खेळाडू बनला नंबर १ फलंदाज
ICC Test Rankings : दीर्घकाळापासून अव्वल स्थानावर राज्य करणाऱ्या ऑस्ट्रेलियाच्या ट्रॅव्हिस हेडला मोठा फटका बसला असून त्याची थेट चौथ्या स्थानावर घसरण झाली आहे.
ICC Men Test Batter Rankings Updates Harry Brook Number 1 Travis Head Slips : आयसीसीने नुकतीच ताजी कसोटी क्रमवारी (ICC Test Rankings) जाहीर केली असून, यामध्ये फलंदाजांच्या क्रमवारीत प्रचंड फेरबदल पाहायला मिळत आहेत. दीर्घकाळापासून अव्वल स्थानावर राज्य करणाऱ्या ऑस्ट्रेलियाच्या ट्रॅव्हिस हेडला (Travis Head) मोठा फटका बसला असून त्याची थेट चौथ्या स्थानावर घसरण झाली आहे. तर दुसरीकडे इंग्लंडचा धडाकेबाज फलंदाज हॅरी ब्रूकने (Harry Brook) ८५२ रेटिंग गुणांसह जगातील अव्वल (नंबर १) कसोटी फलंदाज बनण्याचा बहुमान पटकावला आहे.
हॅरी ब्रूक अव्वल स्थानी; जो रूट आणि स्मिथलाही फायदा –
ताज्या क्रमवारीत इंग्लंडच्या हॅरी ब्रूकने एका स्थानाची झेप घेत ८५२ रेटिंगसह पहिले स्थान पटकावले आहे. इंग्लंडचा दिग्गज फलंदाज जो रूट एका स्थानाच्या फायद्यासह ८४० रेटिंग गुणांसह दुसऱ्या क्रमांकावर पोहोचला आहे. ऑस्ट्रेलियाचा स्टार फलंदाज स्टीव्ह स्मिथ एका पायरीने पुढे सरकत ८३३ रेटिंगसह तिसऱ्या स्थानावर आला आहे. मात्र, अव्वल स्थानावरून थेट तीन स्थानांची घसरण झालेल्या ट्रॅव्हिस हेडचे रेटिंग ८१९ वर आले असून तो चौथ्या क्रमांकावर फेकला गेला आहे. दक्षिण आफ्रिकेचा कर्णधार टेंबा बावुमा (७७५) पाचव्या स्थानावर कायम आहे.
भारतीय फलंदाजांच्या क्रमवारीत कोणताही बदल नाही!
Here are all the No.1’s in the latest ICC rankings!🏏 pic.twitter.com/OYmRLELhW9
— CricInformer (@CricInformer) August 19, 2026
या आठवड्याच्या क्रमवारीत भारतीय खेळाडूंच्या स्थानावर कोणताही परिणाम झालेला नाही. भारतीय कसोटी कर्णधार शुबमन गिल ७४३ रेटिंग गुणांसह सातव्या स्थानावर कायम आहे, तर सलामीवीर यशस्वी जैस्वाल ७३३ रेटिंगसह नवव्या क्रमांकावर आहे. पाकिस्तानचा बाबर आझम ७१६ रेटिंग गुणांसह दहाव्या स्थानावर आहे.
पुढील अपडेटमध्ये होणार भारतीय खेळाडूंची एन्ट्री –
आयसीसीची ही ताजी क्रमवारी १८ ऑगस्टपर्यंतच्या सामन्यांवर आधारित असल्याने गॉल येथे बुधवारी संपलेल्या भारत विरुद्ध श्रीलंका पहिल्या कसोटी सामन्यातील कामगिरीचा यात समावेश झालेला नाही. त्यामुळे देवदत्त पडिक्कलचे शतक आणि मानव सुथारचे १० विकेट्स यांसारख्या चमकदार कामगिरीचे प्रतिबिंब पुढील आठवड्यात जाहीर होणाऱ्या आयसीसी क्रमवारीत पाहायला मिळेल, ज्यामध्ये भारतीय खेळाडूंना मोठी झेप घेण्याची संधी असेल.
