Daund Politics – दौंड तालुक्यातील सर्वांत संवेदनशील आणि राजकारणाचा केंद्रबिंदू असलेल्या भीमा-पाटस सहकारी साखर कारखान्याच्या संचालक मंडळाच्या निवडणुकीच्या हालचालींना वेग आला आहे. मुंबई उच्च न्यायालयाच्या अंतरिम आदेशानुसार निवडणुकीची अधिकृत प्रक्रिया सुरू करण्यात आली आहे. जिल्हा सहकारी निवडणूक अधिकारी तथा प्रादेशिक सहसंचालक (साखर) डॉ. प्रवीण बागुल यांनी प्रारूप मतदार यादीचा कार्यक्रम जाहीर केला आहे.

दरम्यान, भीमा-पाटस सहकारी साखर कारखान्याच्या निवडणूक प्रक्रिया सुरू झाल्याने दौंडची रणभूमी तापली आहे. आरोप- प्रत्यारोपाच्या सहकारातील शिवारात रणधुमाळी दिसणार आहे. यावेळी आमदार राहुल कुल आणि माजी आमदार रमेश थोरात यांच्यात अटीतटीचा सामना होणार काय, याकडे जिल्ह्याचे लक्ष लागले आहे.

दरम्यान, सत्वशील शितोळे आणि वसंत साळुंखे यांनी मुंबई उच्च न्यायालयाच्या आदेशानुसार निवडणूक निधीसाठी ४० लाख १२ हजार रुपयांचा धनादेश पुणे जिल्हा मध्यवर्ती सहकारी बँकेच्या पाटस शाखेमार्फत प्रादेशिक सहसंचालक (साखर), पुणे विभाग यांच्याकडे सुपूर्द केला आहे. तसेच निवडणूक प्रक्रिया तातडीने सुरू करण्याची विनंती करण्यात आली आहे.

निवडणूक प्रक्रियेतील पहिल्या महत्त्वाच्या टप्प्यात (दि.१९) ऑगस्ट रोजी सकाळी ११ वाजता प्रारूप मतदार यादी प्रसिद्ध करण्यात आली आहे. या यादीवर सभासदांना हरकती व आक्षेप नोंदवता येणार असून त्यासाठी (दि.१९) ते (दि.२८) रोजी हा कालावधी देण्यात आला आहे. प्राप्त हरकती व आक्षेपांवर ७ सप्टेंबर २०२६ पर्यंत निर्णय घेण्यात येणार असून त्यानंतर ११ सप्टेंबरपर्यंत अंतिम मतदार यादी प्रसिद्ध केली जाणार आहे.

प्रारूप मतदार यादी प्रादेशिक सहसंचालक (साखर), पुणे विभाग, भीमा सहकारी साखर कारखाना (पाटस), सहाय्यक निबंधक (दौंड व बारामती) तसेच तहसीलदार कार्यालय, दौंड येथे पाहण्यासाठी उपलब्ध राहणार आहे. मतदार यादीबाबत कोणत्याही सभासदास हरकत किंवा आक्षेप असल्यास तो २८ ऑगस्ट २०२६ पर्यंत प्रादेशिक सहसंचालक (साखर), पुणे विभाग, पहिला मजला, साखर संकुल, शिवाजीनगर, पुणे येथे प्रत्यक्ष किंवा [email protected] या ई-मेलवर दाखल करता येणार आहे.

दसरा आणि दिवाळीत राजकीय फटाके
भीमा पाटस कारखान्याची निवडणूक ही ऑक्टोंबर मध्येच होण्याची शक्यता आहे. निवडणूक प्रक्रिया पूर्ण होऊन ऑक्टोबरमध्येच निवडणुकीचा बार उडणार असल्याची शक्यता आहे. त्यामुळे दौंडच्या रणभूमीत दसरा आणि दिवाळीतच राजकीय फटाके फुटणार असल्याची चर्चा सुरू झाली आहे. या निवडणूक प्रक्रियेमुळे भीमा-पाटस कारखान्याच्या आगामी संचालक मंडळाच्या निवडणुकीकडे सभासदांचे आणि तालुक्यातील राजकीय वर्तुळाचे लक्ष लागले आहे.