प्रभात वृत्तसेवा पाटस – दौंड तालुक्यातील रोटी येथील ग्रामदैवत श्री रोटमलनाथ मंदिरात होत असलेल्या ऐतिहासिक पारंपरिक जावळ विधी कार्यक्रमाच्या संदर्भात राज्य महिला आयोगाचे अध्यक्ष रूपाली चाकणकर यांनी कारवाई करण्याच्या आदेशामुळे दौंड तालुक्यातील शितोळे-देशमुख घराण्यातील महिला संतप्त झाल्या आहेत. रोटी येथील रविवार (दि.२८) रोजी पार पडलेल्या निषेध सभेत चाकणकर यांनी माफी मागावी अन्यथा त्यांना न्यायालयात खेचू, असा इशारा महिलांनी दिला आहे. दौंड तालुक्यातील रोटी येथील श्री रोटमलनाथ मंदिरात पडणाऱ्या पारंपरिक जावळ विधीत महिलांना जबरदस्तीने मुंडन करून विद्रूप केले जाते. या प्रकरणाची चौकशी करून सात दिवसात कारवाईचा अहवाल सादर करण्याचे आदेश राज्य महिला आयोगाच्या अध्यक्षा रूपाली चाकणकर यांनी पुणे जिल्हाधिकारी यांना नुकतेच दिले होते. महिला आयोगाचे अध्यक्ष चाकणकर यांनी घेतलेल्या भूमिकेचा तीव्र पडसाद दौंड तालुक्यात आणि रोटी गावात उमटले आहेत. तर मागील दोन दिवसांपासून समाज माध्यमावर चाकणकर यांचा निषेध करणाऱ्या पोस्ट व्हायरल झाल्या आहेत. रविवारी दि (२८) रोटी येथील रोटमलनाथ मंदिर जवळ तालुक्यातील शितोळे-देशमुख परिवाराच्या वतीने निषेध सभा पार पडली. या निषेध सभेत शितोळे घराण्यातील अनेक मान्यवरांनी जावळ विधी परंपरा काय आहे आणि ते कधीपासून रूढ आहे याचाही ऐतिहासिक दाखले देत रूपाली चाकणकर यांचा निषेध केला. रोटमलनाथ मंदिर ट्रस्टचे पदाधिकारी सचिन शितोळे म्हणाले की, ८०० वर्षांपूर्वीचे मंदिर आहे. रोटमलनाथ मंदिरात जावळचा प्रथा कायम स्वरूपाची आहे. रोटी गावातील ५०० वर्षापासून जावळ इतिहास आहे. मुलाचे जावळ, आईचे मुंडण करण्याची प्रथा आहे. घरात पहिला मुलगा होईल त्यावेळी मंदिरात मामाच्या मांडीवर बसून जावळ होत आहे. यावेळी मुलाची आई ही बट किंवा मुंडण केले जाते. ही परंपरा अनेक वर्षांची आहे. यावेळी कुरकुंभच्या महिला पोलीस पाटील रेश्मा शितोळे म्हणाले की, जावळ काढण्याची पद्धतीबाबत आम्हाला अभिमान आहे. आमच्यावर कुटुंबात कोणतीही जबरदस्ती केली जात नाही. आमची अनेक वर्षांपासूनची परंपरा आहे. माझे १० वर्षापूर्वी जावळ झाले आहे. मी स्वइच्छेने हा निर्णय घेतला होता. कुटुंबातील कोणीही दबाव आणला नाही. रुपाली चाकणकर यांना देखील आम्ही एका जावळाच्या कार्यक्रमात आमंत्रण देणार आहे आणि त्यांनी स्वतः येऊन पहावे. असे आवाहन त्यांनी केले. तसेच डॉ. पूजा शितोळे यांनी सांगितले, मी स्वतः डॉक्टर असून मी स्वइच्छेने व संमतीने जावळ अर्पण केले आहे. तिरुपती बालाजी देखील केस दान करीत असतात मग त्याठिकाणी का आक्षेप घेतला जात नाही ? तसेच शकुंतला शितोळे, दौंड पंचायत समितीचे माजी सभापती आशा शितोळे, तेजस्विनी शितोळे, सुभद्रा शितोळे, ॲड. संतोष शितोळे, वसंत साळुंके, नितीन दोरगे, राजवर्धन जगताप, मनोज फरतडे, साहेबराव वाबळे,अंकिता गरुड यांनी आपले मत नोंदवत चाकणकर यांचा निषेध नोंदवला. राष्ट्रवादीचे नेते माजी आमदार रमेश थोरात यांनी या घटनेचा निषेध नोंदवला आहे.
