Datta Meghe Passes Away : गेल्या काही दिवसांपासून प्रकृती अस्वास्थ्यामुळे त्यांच्यावर उपचार सुरू होते. रविवारी संध्याकाळी साडे सात वाजताच्या दरम्यान त्यांची प्राणज्योत मालवली. माजी मंत्री आणि ज्येष्ठ नेते दत्ता मेघे यांचे वयाच्या 89 वर्षी निधन झाले आहे. गेल्या काही दिवसांपासून प्रकृती अस्वास्थ्यामुळे त्यांच्यावर उपचार सुरू होते. रविवारी संध्याकाळी साडे सात वाजताच्या दरम्यान त्यांची प्राणज्योत मालवली. दत्ता मेघे यांच्या निधनाने सर्वच स्तरातून हळहळ व्यक्त केली जात आहे. आपल्या आयुष्यातील अनेक वर्षे त्यांनी काँग्रेस पक्षात घालवली. त्यानंतर आयुष्याच्या उत्तरार्ध त्यांनी भारतीय जनता पक्षात प्रवेश केला. काँग्रेसचे सरकार असताना ते नागपूरचे पालकमंत्री होते. त्यासोबतच रामटेक, वर्धा लोकसभा मतदार संघातून ते खासदार म्हणून देखील निवडून गेले होते. त्यांचे शैक्षणिक व सामाजिक क्षेत्रात भरीव काम होते. दत्ता मेघे यांच्या निधनाने विदर्भासह राज्याच्या राजकीय, शैक्षणिक व सामाजिक क्षेत्रात मोठी पोकळी निर्माण झाली आहे. दत्ता मेघे हे हिंगणा विधानसभा मतदार संघातील भाजप आमदार समीर मेघे यांचे वडील आहेत. राजकीय कारकीर्द दत्ता मेघे यांचा जन्म 11 नोव्हेंबर 1936 रोजी वर्धा जिल्ह्यातील पवनार येथे झाला होता. त्यांनी आपल्या दीर्घ राजकीय कारकिर्दीत काँग्रेस, राष्ट्रवादी काँग्रेस तसेच भाजपमध्ये काम करत 4 वेळा लोकसभा खासदार म्हणून नागपूर, रामटेक व वर्धा मतदारसंघांचे प्रतिनिधित्व केले. विदर्भातील तीन मतदारसंघातून खासदार म्हणून निवडून येणारे ते विदर्भातील एकमेव नेते आहेत. राज्यसभेतही सदस्य म्हणून त्यांनी काम केले. राज्याचे ते विरोधी पक्षनेतेही राहिले. राज्यसभा सदस्य तसेच महाराष्ट्र विधानपरिषदेतही त्यांनी महत्त्वाची जबाबदारी पार पाडली होती. १९७८ च्या शरद पवार यांच्या नेतृत्वाखालील पुलोद सरकारमध्ये ते पहिल्यांदा मंत्री झाले. मोफत वैद्यकीय उपचार उपलब्ध नागपूर, वर्धा जिल्ह्यात अनेक शैक्षणिक संस्था, वैद्यकीय शिक्षण संस्था उभारणीत दत्ता मेघे यांचे योगदान राहिले. गडचिरोलीपासून मेळघाटपर्यंत आदिवासी भागात दत्ता मेघे यांनी मोफत वैद्यकीय शिबिरांच्या माध्यमातून आदिवासी बांधवांचे आरोग्य सुधारण्यासाठी प्रयत्न केले. सावंगी मेघे येथे त्यांनी गरिबांसाठी मोफत वैद्यकीय उपचार उपलब्ध करून दिले. शिक्षण क्षेत्रातही उल्लेखनीय कार्य दत्ता मेघे यांनी राजकारणासोबतच शिक्षण आणि आरोग्य क्षेत्रात उल्लेखनीय काम केले आहे. नागर युवक शिक्षण संस्थाच्या माध्यमातून तसेच ‘दत्ता मेघे इन्स्टीट्यूट ऑफ मेडीकल सायन्स’सारख्या संस्थांच्या उभारणीतून त्यांनी ग्रामीण भागात शिक्षण व आरोग्य सुविधा पोहोचवल्या. त्यांच्या कार्यामुळे विदर्भातील हजारो विद्यार्थ्यांना संधी मिळाली. Devendra Fadnavis नितीन गडकरींनी वाहिली श्रद्धांजली ‘ज्येष्ठ नेते, राज्याचे माजी मंत्री आणि माझ्या ज्येष्ठ बंधूंसारखे असलेले दत्ताभाऊ मेघे यांच्या निधनाचे वृत्त अतिशय दुःखद आहे. त्यांना माझी भावपूर्ण श्रद्धांजली. दत्ताभाऊंच्या जाण्याने विदर्भाच्या राजकीय व सामाजिक क्षेत्राची मोठी हानी झाली आहे. विदर्भातील शैक्षणिक आणि वैद्यकीय क्षेत्रातील दत्ताभाऊंचे योगदान उल्लेखनीय आणि महत्त्वपूर्ण आहे. विदर्भातील तरुणांना उच्चशिक्षणाची सुविधा उपलब्ध करून देण्यासाठी शैक्षणिक संस्थांच्या माध्यमातून त्यांनी मोठी संधी उपलब्ध करून दिली. माझ्या राजकीय जीवनाच्या सुरुवातीच्या काळात आणि पुढेही वैचारिक विरोधक असूनही दत्ताभाऊंनी कायम मला प्रेम-जिव्हाळा दिला व मार्गदर्शन केले. लहान बंधू प्रमाणे त्यांनी नेहमीच माझ्यावर प्रेम केले. प्रकृती अस्वास्थ्य असूनही विदर्भातील ज्येष्ठ नागरिकांसाठी काम करण्याची त्यांची तळमळ कायम होती. त्यांचे सर्वसमावेशी नेतृत्व राजकीय कार्यकर्त्यांसाठी आदर्श होते. ईश्वर दिवंगत आत्म्यास शांती प्रदान करो आणि त्यांच्या परिवारास आणि सर्वांनाच या दुःखातून सावरण्याची शक्ती देवो,’ अशी भावना केंद्रीय मंत्री नितीन गडकरी यांनी व्यक्त केली आहे. ‘दातृत्वाचा धनी हरपला ‘ तर ज्येष्ठ नेते, माजी मंत्री दत्ताभाऊ मेघे यांच्या निधनाने दातृत्वाचा धनी हरपला आहे. शिक्षण संस्थांचे जाळे आणि प्रचंड मोठे सामाजिक कार्य उभे करताना त्यांच्या संपूर्ण राजकारणात सामान्य माणूस हा कायम केंद्रस्थानी असायचे, असेम्हणत मुख्यमंत्री देवेंद्र फडणवीस यांनी दत्ता मेघे यांना श्रद्धांजली अर्पण केली आहे. हेही वाचा: Harshvardhan Sadgir Retirement : कुस्ती विश्वात खळबळ! हर्षवर्धन सदगीरने महाराष्ट्र केसरीची गदा उंचावताच कुस्तीला ठोकला रामराम
