Dahiwadi News – येथील सार्वजनिक बांधकाम विभागाच्या कार्यालयासमोरील रस्त्याची खड्ड्यांमुळे दुरवस्था झाली होती. याबाबत दैनिक प्रभात प्रसिद्ध केलेल्या वृत्ताची दखल घेत सार्वजनिक बांधकाम विभागाने खड्डे बुजुवण्याच्या कामाला सुरुवात केली आहे. त्यामुळे वाहनाधरकांसह स्थानिकांमधूनही समाधान व्यक्त करण्यात येत आहे. माण तालुक्याचे मुख्य ठिकाण असलेल्या दहिवडी येथील सार्वजनिक बांधकाम उपविभाग कार्यालयाच्या अगदी समोरील रस्त्याची खड्ड्यांमुळे चाळण झाली होती.

ज्या विभागाकडे संपूर्ण तालुक्यातील रस्त्यांची जबाबदारी आहे, त्याच विभागाच्या कार्यालयाच्या अंगणात खड्ड्यांचे साम्राज्य असल्याने नागरिकांमधून तीव्र संताप व्यक्त होत होता. पावसाचे पाणी साचून रोज होणारे किरकोळ अपघात आणि नागरिकांचा रोष यावर सडेतोड प्रकाश टाकणारे वृत्त दैनिक प्रभातने प्रसिद्ध केले होते. वृत्त प्रसिद्ध झाल्यानंतर खडबडून जाग आलेल्या बांधकाम विभागाच्या अधिकार्‍यांनी तात्काळ कर्मचार्‍यांना आदेश देऊन रस्त्यावरील खड्डे बुजवण्याचे काम हाती घेतले. पावसाचा अंदाज घेऊन खड्ड्यांमध्ये साचलेले पाणी काढून, तिथे खडी व डांबराचा वापर करून तात्पुरती डागडुजी करण्यात आली आहे.

वाहनचालकांना दिलासा
धोकादायक ठरत असलेले खड्डे बुजवल्यामुळे वाहनचालकांना दिलासा मिळाला आहे. सध्या तरी अपघात टळण्यास मदत होणार आहे. प्रशासनाने दाखवलेल्या या तत्परतेबद्दल नागरिकांनी समाधान व्यक्त केले असले, तरी हा केवळ मलमपट्टीचा प्रकार न ठरता, पावसाळ्यानंतर या रस्त्याचे पूर्णपणे डांबरीकरण करून तो कायमस्वरूपी दर्जेदार करावा, अशी अपेक्षा नागरिकांनी व्यक्त केली आहे.