Cycle Rally – छत्रपती शिवाजी महाराज यांच्या जयंतीचे औचित्य साधून नारायणगाव-जुन्नर मार्गावर भव्य सायकल रॅलीचे आयोजन करण्यात आले होते. या रॅलीत तब्बल ११०० सायकलस्वारांनी उत्स्फूर्त सहभाग नोंदवत देशभक्ती आणि शिवप्रेमाची भावना जागृत केली. शिवनेरी ॲथलेटिक सोसायटीच्या वतीने आयोजित करण्यात आलेल्या या उपक्रमाला राजमुद्रा सामाजिक सेवा संघटनेने मोलाचे सहकार्य केले. या सायकल रॅलीमध्ये शालेय विद्यार्थी, तरुण, महिला आणि ज्येष्ठ नागरिकांचा मोठा सहभाग दिसून आला. संपूर्ण मार्गावर ‘छत्रपती शिवाजी महाराज की जय’ अशा घोषणांनी आणि टाळ्यांच्या गजरात उत्साहाचे वातावरण निर्माण झाले होते. रॅलीच्या माध्यमातून युवकांमध्ये आरोग्यदायी जीवनशैली, एकात्मता आणि समाजभावनेचा संदेश प्रभावीपणे पोहोचवण्यात आला. शिस्तबद्ध पद्धतीने पार पडलेल्या या रॅलीमुळे जुन्नर परिसरात क्रीडा संस्कृतीला नवी चालना मिळाल्याची भावना नागरिकांनी व्यक्त केली. कार्यक्रमास प्रमुख पाहुणे म्हणून बाबूभाऊ पाटे, अमित बेनके, नारायणगावच्या लोकनियुक्त सरपंच शुभदा वाव्हळ आणि वारुळवाडीचे माजी सरपंच विनायक भुजबळ उपस्थित होते. मान्यवरांनी यावेळी उपस्थितांना मार्गदर्शन करताना युवकांनी फिटनेस आणि सामाजिक उपक्रमांमध्ये सक्रिय सहभाग घेण्याचे आवाहन केले. या रॅलीच्या यशस्वी आयोजनामुळे सायकलिंगकडे युवकांचा कल वाढत असल्याचे दिसून आले.
