देहूगाव  – तीर्थक्षेत्र देहू येथील इंद्रायणी नदी घाटावर गोधड्या, अंथरूण-पांघरूण, ब्लँकेट, चादरी आणि इतर कपडे धुण्यासाठी पंचक्रोशीतील नागरिकांची गर्दी होत आहे. धुतलेले कपडे घाट परिसरात तसेच नदीवरील पुलाच्या दोन्ही बाजूंच्या लोखंडी संरक्षक कठड्यांवर वाळत घातले जात आहेत.

आजपासून (दि. ११) शारदीय नवरात्रोत्सवाला प्रारंभ होत आहे. घटस्थापनेपासून दसऱ्यापर्यंत देवीचा जागर, भजन, कीर्तन आणि विविध धार्मिक कार्यक्रमांचे आयोजन केले जाते. त्यानंतर दिवाळीचा सण येत असल्याने घरांची साफसफाई आणि रंगरंगोटी करण्याची परंपरा आहे. पितृपंधरवड्याच्या पार्श्वभूमीवर घरातील गोधड्या, अंथरूण-पांघरूण, चादरी आणि इतर कपडे धुण्याची लगबग सुरू झाली आहे.

इंद्रायणी नदीपात्रात वाहणारे पाणी आणि घाटाचा विस्तीर्ण परिसर यामुळे गेल्या आठवडाभरापासून येथे कपडे धुण्यासाठी नागरिकांची गर्दी होत आहे. महिला, पुरुष आणि लहान मुलांसह अनेक जण दुचाकी, तीनचाकी तसेच चारचाकी वाहनांतून गोधड्या, चादरी आणि ब्लँकेट घेऊन घाटावर येत आहेत. कपडे धुतल्यानंतर ते घाट परिसरातील झाडांना बांधलेल्या दोऱ्यांवर तसेच पुलाच्या दोन्ही बाजूंच्या लोखंडी कठड्यांवर वाळत घातले जात आहेत.

नदीपात्रात जुने कपडे टाकण्याचे प्रकार
घरात अनुपयोगी ठरलेले, फाटलेले किंवा जीर्ण झालेले कपडे आणि गोधड्या काही नागरिकांकडून नदीपात्रात अथवा नदीकाठावर टाकल्या जात असल्याचे दिसून येत आहे. त्यामुळे नदी परिसराच्या स्वच्छतेचा प्रश्न निर्माण होत आहे. कपडे धुण्यासाठी येणाऱ्या नागरिकांनी नदी परिसरात कचरा टाकणे टाळून स्वच्छता राखण्याची गरज आहे.

इंद्रायणी नदी स्वच्छ राखण्यासाठी देहू नगरपंचायत प्रशासनाने नदीपात्रात कपडे, गोधड्या आणि भांडी धुण्यास मनाई करणारे फलक ठिकठिकाणी लावले आहेत. नियमांचे उल्लंघन करणाऱ्यांवर दंडात्मक कारवाई करण्याचा इशाराही देण्यात आला आहे. मात्र, या सूचनांकडे दुर्लक्ष होत असल्याने नदी स्वच्छतेच्या प्रयत्नांना अडथळा निर्माण होत आहे.

Sanjay Raut: मार्च-एप्रिल महिन्यांपर्यंत मोदी सरकार पडेल- खासदार संजय राऊत