Sunil Tatkare on Congress : राज्याच्या उपमुख्यमंत्री आणि राष्ट्रवादी काँग्रेस पक्षाच्या राष्ट्रीय अध्यक्षा सुनेत्रा पवार यांच्यावर टीका करताना काँग्रेसने गुंगी गुडिया असा उल्लेख केल्यानंतर राजकीय वातावरण चांगलचं तापलं आहे.

या टीकेवरुन राज्यभरात राष्ट्रवादी काँग्रेसच्या वतीने काँग्रेस पक्षाचा तीव्र निषेध नोंदवण्यात येत आहे. या संपूर्ण प्रकरणावर आता पक्षाचे प्रदेशाध्यक्ष सुनील तटकरे यांची प्रतिक्रिया समोर आली आहे.

“काल रात्री उशिरा काँग्रेसने दिलगिरी व्यक्त केली. पण दिलगिरी व्यक्त करुन विषय संपत नाही. काहीवेळेला काय बोलायचं याचं भान असावं लागतं. दुर्देवाने काँग्रेसचं राज्य पातळीवरील नेतृत्व ते विसरलेलं दिसतय.” अशा शब्दांत सुनील तटकरेंनी काँग्रेसचे कान टोचले.

तसेच ते पुढं म्हणाले “आज वहिनी ज्या पद्धतीचं काम करतायत त्यामुळे काँग्रेसच्या भवितव्याची चिंता असणारी मंडळी अशी टीका टिप्पणी करत राहणार. आम्ही काम करत राहू.” अशा शब्दांत काँग्रेसच्या टीकेचा समाचार घेतला.

सुनेत्रा पवारांवरील टीकेला जशाच तसं उत्तर राष्ट्रवादी काँग्रेस पक्षातील नेत्यांकडून देण्यात आलं आहे. राज्यातील अनेक ठिकाणी पक्षाच्या वतीने काँग्रेसवर टीकेचा सूर आवळण्यात येत असून पदाधिकारी, कार्यकर्ते रस्त्यावर उतरून काँग्रेसच्या टीकेचा निषेध नोंदवत आहेत.

मोठा वाद निर्माण झाल्यानंतर काँग्रेस पक्षाचे प्रदेशाध्यक्ष हर्षवर्धन सपकाळ यांनी पत्रकार परिषद घेत सविस्तर भूमिका मांडली. मात्र, पत्रकार परिषद सुरू असताना राष्ट्रवादीचे नेते सूरज चव्हाण यांच्यासह काही कार्यकर्त्यांना मोठा राडा घातला. यावर देखील सुनील तटकरे यांनी भाष्य करत भूमिका मांडली.

तटकरे म्हणाले “सुनेत्रा पवारांसंदर्भातील काँग्रेसच्या पोस्टचा मी निषेध करतो. काँग्रेसने वैचारिक दिवाळखोरी दाखवली. त्या संदर्भात राष्ट्रवादी काँग्रेसचे कार्यकर्ते आपल्या संतप्त भावना व्यक्त करत आहेत.”

राऊतांच्या प्रतिक्रेयेवर सुनील तटकरे म्हणाले….

या संपूर्ण प्रकरणावर संजय राऊत यांनी देखील आपली प्रतिक्रिया दिली होती. “सुनेत्रा पवारांवर ही टीका त्या अजित पवारांच्या पत्नी आहेत म्हणून नाही तर त्या घटनात्मक पदावर आहेत म्हणून होते.” असं त्यांनी म्हटलं होतं.

राऊतांच्या या टीकेवर प्रतिक्रिया देताना सुनील तटकरे म्हणाले “राऊतांना हे माहित नाहीय की, वहिनी प्रशासनात प्रभावीपणे काम करतायत. आपला विचार स्पष्टपणे मांडत असतात. अनेक वेळा पत्रकारांशी संवाद होतो. त्यामुळे राऊतांच्या फुकटच्या सल्ल्याची आम्हाला गरज नाही” असा शब्दांत सुनील तटकरेंनी त्यांच्यावर पलटवार केला.

Tabu : तब्बूने घेतली दिल्ली उच्च न्यायालयात धाव; नेमकं काय घडलं?