Rahul Gandhi – पंतप्रधान नरेंद्र मोदींना कोणत्याही मंचावर खुल्या चर्चेचे आव्हान देणाऱ्या काँग्रेस नेते राहुल गांधींवर जनता दल (युनायटेड) म्हणजेच जेडीयूने टीका केली आहे. राहुल गांधींनी रस्त्यावर वाद घालण्याऐवजी केंद्रीय गृहमंत्री अमित शहा यांच्या संसदेच्या विशेष अधिवेशनाचा प्रस्ताव स्वीकारून संसदेत चर्चा करावी, असे जेडीयूने म्हटले आहे.

पंतप्रधानांनी विरोधी पक्ष राष्ट्रविरोधी आहेत असा आरोप केल्यानंतर, राहुल गांधींनी मंगळवारी पंतप्रधान मोदींना खुल्या चर्चेचे आव्हान दिले होते. तसेच, आपल्यावर परदेशी संबंधांचे आरोप करणाऱ्या पंतप्रधानांनी आपल्याविरोधात मानहानीचा खटला का दाखल केला नाही, असा सवालही त्यांनी केला होता.

जेडीयूचे प्रवक्ते राजीव रंजन प्रसाद यांनी पीटीआयशी बोलताना सांगितले की, लोकशाहीत चर्चा झालीच पाहिजे आणि यासाठी भारतीय संसद हेच सर्वात योग्य व्यासपीठ आहे. जर केंद्रीय गृहमंत्री अमित शहा यांनी राहुल गांधींना संसदेत चर्चेचे आव्हान दिले असेल आणि राहुल गांधींनाही चर्चा करायची असेल, तर ते या संधीचा वापर का करत नाहीत? असा सवाल प्रसाद यांनी केला.

राहुल गांधींनी रस्त्यावर मते मांडण्याऐवजी लोकसभेचे विशेष सत्र बोलवण्याची मागणी करावी, असे आवाहनही जेडीयू प्रवक्त्यांनी केले. राहुल गांधींनी लोकसभेच्या सभागृहात आपले विचार मांडून हवे असलेले सर्व प्रश्न विचारावेत. तसेच, त्यांच्यावर उपस्थित केलेल्या प्रश्नांची उत्तरेही त्यांनी सभागृहात द्यावीत, असे प्रसाद म्हणाले.