शिरूर:  पुणे जिल्हा तसेच शेजारील अहमदनगर जिल्ह्यातील दोन तालुक्यांतून दोन वर्षांसाठी तडीपार करण्यात आलेल्या सराईत आरोपीने हद्दपारीच्या आदेशाला हरताळ फासून आपल्या मूळ गावात प्रवेश केल्याचे उघड होताच शिरूर पोलिसांनी तातडीने कारवाई करून त्याला कवठे यमाई येथून अटक केली.

तडीपारीच्या आदेशाचे उल्लंघन केल्याप्रकरणी त्याच्याविरुद्ध मुंबई पोलीस कायद्याच्या कलम १४२ अन्वये गुन्हा दाखल करण्यात आला आहे. अटक करण्यात आलेल्या आरोपीचे नाव योगेश तुकाराम देवकर (वय ३०, रा. कवठे यमाई, ता. शिरूर, जि. पुणे) असे आहे. याप्रकरणी शिरूर पोलीस ठाण्याचे पोलीस उपनिरीक्षक गोविंद ज्ञानदेव खटींग यांनी फिर्याद दिली आहे.

Top 10 News : राज्यातील 5 जिल्ह्यांना रेड अलर्टचा इशारा, उपमुख्यमंत्री एकनाथ शिंदे रुग्णालयात दाखल आणि वैभवचा आंतरराष्ट्रीय ऐतिहासिक डेब्यू फिका, वाचा टॉप १० बातम्या

पोलिसांनी दिलेल्या माहितीनुसार, उपविभागीय दंडाधिकारी (पुणे उपविभाग) यांनी १४ ऑक्टोबर २०२५ रोजी दिलेल्या आदेशानुसार योगेश देवकर याला संपूर्ण पुणे जिल्हा (पुणे शहर व पिंपरी-चिंचवड पोलीस आयुक्तालयाच्या हद्दीसह) तसेच अहमदनगर जिल्ह्यातील पारनेर आणि श्रीगोंदा तालुक्यांच्या हद्दीतून दोन वर्षांसाठी तडीपार करण्यात आले होते.

संबंधित आदेश लागू असताना कोणत्याही सक्षम प्राधिकाऱ्याची पूर्वपरवानगी न घेता आरोपी शनिवारी (दि. ४ जुलै) सकाळी सुमारे दहा वाजण्याच्या सुमारास कवठे यमाई गावाच्या हद्दीत आल्याची माहिती शिरूर पोलिसांना मिळाली.
या माहितीची खातरजमा करून पोलीस उपनिरीक्षक गोविंद खटींग आणि त्यांच्या पथकाने तातडीने सापळा रचत आरोपीला ताब्यात घेतले.

PMC News: माननियांच्या उपचाराचा खर्च १० कोटींवर! नवीन निर्णयाने पालिकेच्या खर्चात दुपटीने वाढ होणार

त्यानंतर शिरूर पोलीस ठाण्यात आणून त्याच्या हद्दपारीच्या आदेशाची पडताळणी करण्यात आली. तपासात आरोपीने तडीपारीच्या आदेशाचे उल्लंघन केल्याचे स्पष्ट झाल्यानंतर त्याच्याविरुद्ध मुंबई पोलीस कायद्यानुसार गुन्हा दाखल करण्यात आला.

तडीपार करण्यात आलेल्या आरोपींवर सातत्याने लक्ष ठेवून त्यांच्याकडून कायद्याचे उल्लंघन होऊ नये, यासाठी शिरूर पोलीस ठाणे विशेष मोहीम राबवत असून, हद्दीत विनापरवानगी प्रवेश करणाऱ्यांवर कठोर कारवाई केली जाणार असल्याचा इशारा पोलिसांनी दिला आहे.

या प्रकरणाचा पुढील तपास शिरूर पोलीस ठाण्याचे पोलीस निरीक्षक विनोद पाटील यांच्या मार्गदर्शनाखाली पोलीस उपनिरीक्षक गोविंद खटींग करत आहेत.

हेही वाचा :

 Maharashtra Rain Update: ‘अत्यावश्यक कामाशिवाय घराबाहेर पडू नका’; नागरिकांना प्रशासनाचे आवाहन