Narhe Robbery Case : नऱ्हे परिसरातील एक कोटी रुपयांच्या दरोडा प्रकरणात नऱ्हे पोलिसांनी तथाकथित पत्रकार आशिष तिवारी याला शुक्रवारी रात्री अटक केली. न्यायालयाने त्याला २७ जुलैपर्यंत पोलिस कोठडी सुनावली आहे. या प्रकरणात राजगड पोलिस ठाण्याच्या हद्दीतील खेड शिवापूर पोलिस चौकीत कार्यरत महिला पोलिस हवालदार प्रमिला शरद निकम आणि पोलिस नाईक अजिज जब्बार मेस्त्री यांनाही सहआरोपी करण्यात आले असून, दोघेही सध्या फरार आहेत.

या कारवाईमुळे पुणे ग्रामीण पोलिस दलात खळबळ उडाली आहे. यापूर्वी या गुन्ह्यात विक्रम विलास चाकणकर (४४), अमेय अरविंद कार्ले (४६) आणि गणेश रमेश कदम (३३, सर्व रा. धायरी) यांना अटक करण्यात आली आहे. या प्रकरणी तळेगाव दाभाडे येथील व्यावसायिक हर्षवर्धन भूषण पवार (३५) यांनी नऱ्हे पोलिस ठाण्यात फिर्याद दिली होती. प्रकरणाची गंभीर दखल घेत पोलिस आयुक्त अमितेश कुमार यांनी पोलिस उपायुक्त सागर कवडे यांना सखोल चौकशीचे आदेश दिले आहेत. तसेच, पुणे ग्रामीणचे पोलिस अधीक्षक संदीपसिंह गिल्ल यांनी स्वतंत्र चौकशी समिती नेमली आहे.

वीस लाख हडपण्याचा झाला प्रयत्न
पोलिसांनी सांगितले की, १८ जुलै रोजी दुपारी फिर्यादी हर्षवर्धन पवार हे सहकारी किरण आपटे यांच्यासह कारने नऱ्हे येथील एचडीएफसी बँकेच्या दिशेने जात असताना नवले पुलाजवळ काही जणांनी दुचाकी आडवी लावून त्यांची कार अडवली. “आम्ही पोलिस आहोत, तुम्ही बेकायदेशीर पैसे घेऊन जात आहात,” असे सांगत आरोपींनी कारचे दरवाजे उघडण्यास भाग पाडले आणि कारमधील एक कोटी रुपयांची रोकड असलेल्या दोन बॅगा हिसकावण्याचा प्रयत्न केला.

यावेळी किरण आपटे यांनी ७३ लाख ५० हजारां रुपयांची बॅग घेऊन कारमधून उतरून ते निघून गेले, त्यामुळे ही रक्कम वाचली. त्यानंतर आरोपींनी हर्षवर्धन पवार यांच्या कारमध्ये बसून त्यांना थेट खेड शिवापूर पोलिस चौकीत घेऊन गेले. तेथे त्यांच्या ताब्यातील दुसऱ्या बॅगेतील २६.५० लाख रुपयांपैकी २० लाख रुपये काढून घेण्याचा प्रयत्न झाला. महिला पोलिसाच्या मदतीने पत्रकाराने ती रक्कम स्वत:च्या दुचाकीच्या डिक्कीत ठेवली.

नंतर प्रकरण अंगलट येईल हे समजताच पुन्हा बॅगेत ठेवली. खेड शिवापूर पोलिस चौकीत सीसीटीव्ही कॅमेरे नसले तरी समोरील हॉटेलमधील सीसीटीव्हीत हा प्रकार कैद झाला होता. राजगड पोलिस ठाण्याचे वरिष्ठ पोलिस निरीक्षक संतोष जाधव यांना ही बाब समजली. त्यांनी केलेल्या गोपनीय चौकशीत हा प्रकार उघडकीस आला.