पुणे – विमाननगर भागातील एका हाॅटेलमध्ये सुरू असलेल्या  देहविक्रय व्यवसायावर गुन्हे शाखेच्या सामाजिक सुरक्षा विभागाने कारवाई केली. या कारवाईत राजस्थानी अभिनेत्रीसह उझबेकिस्तानमधील दोन तरुणींना ताब्यात घेण्यात आले. दलाल परराज्यातील असून, ऑनलाइन पद्धतीने देहविक्रय व्यवसाय चालवित असल्याचे तपासात उघडकीस आले आहे.

याप्रकरणी दलाल इरफान उर्फ राहुल मदन उर्फ मदन सन्यासी आणि रोहित (पूर्ण नाव पत्ता महित नाही) यांच्याविरुद्ध अनैतिक मानवी वाहतूक प्रतिबंधक अधिनियम कायद्यान्वये विमाननगर पोलीस ठाण्यात गुन्हा दाखल करण्यात आला आहे. विमानगर भागातील एका हॉटेलमध्ये मंगळवारी रात्री ही कारवाई करण्यात आली.

आरोपी इराफान आणि रोहित परराज्यातील आहे. ते ऑनलाइन पद्धतीने देहविक्रय व्यवसाय चालवित होते. याबाबतची माहिती सामाजिक सुरक्षा विभागाच्या पथकाला मिळाली. त्यानंतर पोलिसांनी बनावट ग्राहकाच्या मदतीन खातरजमा केली. निको गार्डन रस्त्यावरील एका हाॅटेलमध्ये पोलिसांच्या पथकाने छापा टाकला.

हॉटेलमधील दोन खोल्यांमधून उझबेकिस्तान आणि राजस्थान येथील तीन तरुणींना ताब्यात घेण्यात आले. ताब्यात घेण्यात आलेल्या तरुणींपैकी एक तरुणी राजस्थानी अभिनेत्री असल्याची माहिती तपासात मिळाली आहे.

दलालांनी हॉटेलमधील दोन खोल्या आरक्षित तेथे तरुणींना बोलाविले होते. दलालांनी कोरेगाव पार्क येथील एका हॉटेलमध्ये रुम आरक्षित करून तरुणींकडून देहविक्रय व्यवसाय करुन घेत असल्याचे उघड झाले आहे. गुन्हे शाखेचे पोलीस उपायुक्त अमोल झेंडे यांच्या मार्गदर्शनाखाली वरिष्ठ पोलीस निरीक्षक भरत जाधव, सहायक निरीक्षक अनिकेत पोटे, राजेश माळेगावे, उपनिरीक्षक आश्विनी भोसले, सागर केकाण, मनिषा पुकाळे, अजय राणे यांच्या पथकाने केली आहे.