Indian Student Crime – अमेरिकेतल्या अरिजोना प्रांतात टस्कन येथे मैत्रिणीची हत्या केल्याचा आरोप असलेल्या एका भारतीय विद्यार्थ्याला जर्मनीमध्ये अटक करण्यात आली आहे. भारतात परत जाण्यासाठी विमानात बसण्याच्या तयारीत असताना या विद्यार्थ्याला अटक करण्यात आली.

वरूण बॅचिगारी असे या २० वर्षीय विद्यार्थ्याचे नाव आहे. तो अरिझोना विद्यापीठाचा विद्यार्थी आहे. टस्कन येथे दिनांक ६ ऑगस्ट रोजी जुलिसा रुबी सालझार या गर्लफ्रेंडची हत्या केल्याचा त्याच्यावर आरोप आहे. बॅचिगारी टस्कन आंतरराष्ट्रीय विमानतळावरून जर्मनीच्या विमानात बसला. जर्मनीतून भारतात जाणारे विमान त्याला पकडायचे होते.

टस्कन पोलीस डिपार्टमेंट, टस्कन येथील एफबीआय कार्यालय आणि बर्लिनमधील एफबीआयच्या कायदाविषयक कार्यालयाने समन्वयाने कारवाई करत बॅचिगारी याला जर्मनीत पोचल्यानंतर लगेचच ताब्यात घेतले आणि त्याला भारतात जाण्यापासून रोखले, असे टस्कन पोलिसांनी सांगितले.

गर्लफ्रेंडच्या हत्येनंतर बॅचिगारीने सालाझारचा सेलफोन आणि क्रेडिट कार्ड चोरले आणि गुन्हा लपवण्याच्या स्पष्ट प्रयत्नात, पीडित असल्याचे भासवून तिच्या आईला अनेक मेसेज पाठवले. सालझारच्या कुटुंबीयांनी अधिक तपास केल्यावर तिची हत्या झाल्याचे उघड झाले होते.

घरात बेशुद्धावस्थेत सापडली होती :

पोलिसांनी दिलेल्या माहितीनुसार, जुलिसाबद्दल चिंता वाटल्यामुळे तिच्या कुटुंबीयांनी तिची विचारपूस करण्याची विनंती केली होती. टक्सन पोलीस विभागाच्या म्हणण्यानुसार, स्थानिक वेळेनुसार दुपारी ४ वाजताच्या सुमारास अपार्टमेंटवर पोहोचलेल्या अधिकाऱ्यांना ती बेशुद्ध अवस्थेत सापडली. तिच्या शरीरावर जखमेच्या खुणा होत्या.

त्यानंतर पोलीस अधिकाऱ्यांनी जुलिसाचा प्रियकर वरुण बाचीगारी याला मुख्य संशयित ठरवण्यात आले आहे. त्याने ज्युलिसाचा फोन आणि क्रेडिट कार्ड्स स्वतःच्या ताब्यात घेतली होती. तिच्या आईला तो मेसेज पाठवत होता.

आरोपी वरुणची वादग्रस्त पार्श्वभूमी :

आरोपी वरूण बॅचिगारी हा ॲरिझोना विद्यापीठात ‘बिझनेस ॲनालिटिक्स’चे शिक्षण घेत होता. मात्र एका हाणामारीनंतर त्याला विद्यापीठातून काढून टाकण्यात आल्याने त्याचा तेथील शैक्षणिक प्रवास अचानक थांबला. त्याच्यावर यापूर्वीही कौटुंबिक हिंसाचाराचे आरोप झाल्याचे वृत्त आहे.

वरुणची नोकरी नुकतीच गेली होती, परिणामी त्याला घरभाडेही देता येत नव्हते. त्यामुळे त्याच्या इमिग्रेशन स्टेटसवरही संकट ओढवले होते. प्रेयसीची हत्या किंवा त्याने अमेरिका सोडून जाण्याच्या निर्णयामध्ये याचा काही वाटा होता का, याबद्दल प्रशासनाने अद्याप काहीही स्पष्ट केलेले नाही.