Cricket in the Olympics after 128 years : ऑलिम्पिकमध्ये क्रिकेटचा समावेश करण्याबाबत बराच काळ चर्चा सुरू होती. अनेक वर्षांच्या चर्चेनंतर, अखेर मुंबईत झालेल्या आंतरराष्ट्रीय ऑलिम्पिक समितीच्या (IOC) १४१ व्या अधिवेशनात क्रिकेटला अधिकृत प्रवेश मिळाला आहे. २०२८ च्या लॉस एंजेलिस ऑलिंपिकमध्ये या खेळाचा समावेश करण्यास मान्यता देण्यात आली आहे. विशेष म्हणजे ही मान्यता विराट कोहलीची जगभरात असलेली क्रेझ पाहूण देण्यात आली. त्यामुळे १२८ वर्षांनंतर क्रिकेट ऑलिंपिकमध्ये पुनरागमन करणार आहे.

१९०० च्या ऑलिम्पिकमध्ये क्रिकेट शेवटचे खेळले गेले होते आणि आता २०२८ मध्ये पुन्हा त्याचा समावेश केला जाईल. पण त्याआधी हे जाणून घेणे महत्त्वाचे आहे की त्यात किती आणि कोणते संघ सहभागी होतील? ऑलिम्पिकसाठी पात्र होण्यासाठी त्यांना काय करावे लागेल? त्याचबरोबर क्रिकेटचे सामने कोणत्या फॉरमॅटमध्ये खेळवले जाणार? हे सर्व जाणून घेऊया.

किती संघ आणि कोणत्या फॉरमॅटमध्ये खेळणार?

आंतरराष्ट्रीय क्रिकेट परिषदेचे (ICC) १२ पूर्ण सदस्य देश आहेत, तर ९४ सहयोगी देश आहेत. मात्र, आयओसीने २०२८ च्या लॉस एंजेलिस ऑलिम्पिकमध्ये पुरुष आणि महिला गटात प्रत्येकी ६ संघांचा समावेश करण्यास मान्यता दिली आहे, ज्यांना टी-२० स्वरूपात पदकांसाठी स्पर्धा करावी लागेल. याशिवाय, दोन्ही श्रेणींमध्ये ९०-९० खेळाडूंचा कोटा देखील मंजूर करण्यात आला आहे. याचा अर्थ प्रत्येक संघ ऑलिम्पिकसाठी १५ सदस्यीय संघाची घोषणा करू शकतो. वृत्तानुसार, आयओसीने आधीच आयसीसीला सांगितले होते की स्पर्धेत क्रिकेटचा दर्जा उच्च दर्जाचा असावा. म्हणूनच आयसीसीने जगातील ६-६ सर्वोत्तम संघांचा समावेश करण्याचा प्रस्ताव ठेवला होता.

हेही वाचा – GT vs RR : राजस्थानला मोठा झटका! पराभवानंतर BCCI ची कर्णधारासह संघावर कडक कारवाई

ऑलिम्पिकसाठी संघ कसे पात्र ठरणार?

ऑलिम्पिकसाठी फक्त ६ संघ पात्र ठरू शकतील, परंतु यासाठी पात्रता निकष अद्याप निश्चित झालेले नाहीत. तथापि, अहवालांनुसार, यजमान असल्याने अमेरिकन संघाला थेट प्रवेश मिळू शकतो. यानंतर, आयसीसी रँकिंगच्या आधारे उर्वरित ५ स्थानांसाठी संघांची निवड करता येईल. याचा अर्थ असा की आयसीसीचे टॉप-५ संघ ऑलिम्पिकमध्ये सहभागी होऊ शकतात. यासाठी ‘कट-ऑफ’ तारीख देखील निश्चित केली जाऊ शकते. क्रिकेटच्या प्रवेशानंतर लॉस एंजेलिस ऑलिम्पिक आणखी खास झाले आहे. खेळांचा हा महाकुंभ आता चर्चेचा विषय बनला आहे. २०२८ च्या ऑलिम्पिकमध्ये क्रिकेटसह एकूण ३५१ पदक स्पर्धा होतील, तर पॅरिस ऑलिम्पिकमध्ये  ३२९ पदक स्पर्धा झाल्या होत्या.