Courier Boy Fraud – ग्राहकांचे ९० लाख ३३ हजार रुपये किमतीचे सोन्या-चांदीचे दागिने मुंबईला पोहोचविण्यासाठी घेऊन निघालेल्या कुरिअर बॉयनेच दागिने लंपास करून पोबारा केल्याचा प्रकार समोर आला आहे. जितेंद्र ऋषिकेश सिंह यांनी खडक पोलिस ठाण्यात फिर्याद दिली असून त्यानुसार विशाल सत्यपाल चौहान ( २०, रा. उत्तर प्रदेश) याच्याविरुद्ध गुन्हा दाखल केला आहे.

पोलिसांच्या माहितीनुसार, सिंह यांची घोरपडे पेठेतील राष्ट्रभूषण चौकात एस. जी. एल. जे. पी. लॉजिस्टिक प्रायव्हेट लिमिटेड नावाची कुरिअर कंपनी आहे. ग्राहकांचे पैसे, सोने-चांदीचे दागिने कुरिअरद्वारे पोहोचविण्याचे काम कंपनी करते. पुण्यासह सहा शहरांमध्ये कंपनीचे कामकाज आहे. चौहान हा कंपनीच्या मुंबई कार्यालयात कार्यरत होता.

५ ऑगस्ट रोजी विविध ग्राहकांचे ९० लाख ३३ हजार रुपये किमतीचे सोन्या-चांदीचे दागिने मुंबईला पोहोचविण्यासाठी चौहानकडे दिले होते. मात्र, मुंबई कार्यालयात दागिने जमा न करता तो पसार झाला. फिर्यादी अनेक वर्षांपासून ग्राहकांचे सोने-चांदी कुरिअरद्वारे पोहोचविण्याचे काम करतात. त्यामुळे त्यांची बस वाहकांशी ओळख आहे. चौहान मुंबई कार्यालयात पोहोचला नसल्याचे समजल्यानंतर फिर्यादींनी बस वाहकाशी संपर्क साधला. त्यावेळी चौहान मुंबईला न जाता वाकड पुलाखाली उतरल्याचे वाहकाने सांगितले.