छत्रपती संभाजीनगर – लोकसभा निवडणुकीत विजयी होण्यासाठी महाविकास आघाडीचे माजी खासदार चंद्रकांत खैरे रविवारी (२ जून) दौलताबाद घाटातील दक्षिणमुखी हनुमान मंदिरात यज्ञ करणार आहेत.

त्याचबरोबर एमआयएमचे उमेदवार, खासदार इम्तियाज जलील यांच्या विजयासाठी पक्षाच्या ७ माजी नगरसेवकांनी अजमेर येथील दर्ग्यावर चादर अर्पण केली, तर महायुतीचे उमेदवार संदिपान भुमरे यांच्या पत्नीने पतीच्या विजयासाठी देवाला साकडे घातले आहे.

लोकसभा निवडणुकीची मतमोजणी येत्या मंगळवारी (४ जून) होणार आहे. मतदान १३ मे रोजी झाले होते. गेल्या २३ दिवसांत खैरे यांनी विविध देव-देवतांचे दर्शन घेतले. इम्तियाज जलील हे अजमेर येथे गेले होते. त्यानंतर ते पर्यटनासाठी रवाना झाले.

भुमरे हे आजारी पडल्यामुळे मुंबईत होते. तीन उमेदवारांमध्ये मुख्य लढत असल्याचे मानले जात असताना माजी आमदार हर्षवर्धन जाधव आणि वंचित बहुजन आघाडीचे अफसर खान यांच्या उमेदवारीमुळे चुरस वाढलेली आहे. आपलाच उमेदवार विजयी होणार यासाठी कार्यकर्त्यांनी आकडेमोड केली आहे.

खैरे यांनी चार देवस्थानांना भेट दिली. दौलताबाद घाटातील दक्षिणमुखी हनुमान मंदिर येथे ते रविवारी विचित्र वीर हनुमान याग यज्ञ करणार आहेत. हा सोहळा ८ तास चालणार आहे.

त्याचे ११ ब्राह्मण पौरोहित्य करणार आहेत. यज्ञासाठी ७ किलो तूप, रुई, आंबा, पिंपळ, उंबर झाडांच्या समिधा वापरणार आहेत, अशी माहिती वेदशास्त्रसंपन्न आचार्य कृष्णकांत मुळे यांनी दिली.