Rohit Pawar : इंग्रजांनी जेवढं लुटलं नसेल, तेवढं भ्रष्टाचाराने लुटलंय; चिमुकलीचा भ्रष्टाचाराविरुद्ध आवाज, रोहित पवारांनी शेअर केला व्हिडीओ
Rohit Pawar : राष्ट्रवादी काँग्रेस (शरद पवार गट) चे आमदार रोहित पवार यांनी एका मराठी शाळेतील लहान मुलीचा भ्रष्टाचाराविरुद्धचा प्रेरक व्हिडीओ ट्विटरवर शेअर केला आहे, जो सध्या सोशल मीडियावर तुफान व्हायरल होत आहे. या व्हिडीओत एक चिमुकली भ्रष्टाचाराविरुद्ध ठाम आणि निर्भीडपणे बोलताना दिसते.
ज्यामुळे पुढील पिढी भ्रष्टाचाराच्या विरोधात लढण्यास सज्ज असल्याचं दिसून येत आहे. रोहित पवार यांनी आपल्या ट्विटमध्ये लिहिलं, “भ्रष्टाचाराविरोधात आम्ही तर आज लढतच आहोत, पण आपली पुढची पिढीही त्यासाठी तयार होतेय, हे बघून भारी वाटतंय… व्हॉटस्ॲपवर आलेला मराठी शाळेतल्या चिमुकलीचा हा व्हिडीओ सत्ताधाऱ्यांनी तर आवर्जून बघावा!”
व्हिडीओतील चिमुकलीचा दमदार संदेश
व्हिडीओत ही लहान मुलगी भ्रष्टाचाराचा अर्थ पूर्णपणे न समजताही आपल्या बाबांनी सांगितलेल्या गोष्टींवरून देशाच्या नुकसानाबद्दल बोलते. ती म्हणते, “भ्रष्टाचाराने देश फोपवत चाललाय. इंग्रजांनी जेवढं लुटलं नसेल, तेवढं या भ्रष्टाचाराने लुटलंय. करोडो, हजारो करोडोचे घोटाळे करून हे घोटाळेबाज देशाचं नुकसान करताहेत. ज्यांनी स्वातंत्र्यासाठी प्राण दिले, त्यांच्या डोक्यात फक्त देश स्वतंत्र कसा होईल हा विचार होता. पण या घोटाळेबाजांना फक्त देशाला कुपोषित कसं करायचं हे सुचतं.”
ती पुढे म्हणते, “भारतातील भोळीभाबडी जनता गांधीजींच्या तीन माकडांप्रमाणे आहे – भ्रष्टाचाराबद्दल बोलत नाही, ऐकत नाही, बघत नाही. कारण ती स्वतःच्या समस्यांमध्ये गुंतलेली आहे. भ्रष्टाचारी सामान्य जनतेला लुटून परदेशात सेटल होतात. मला भ्रष्टाचाराचा अर्थ पूर्ण कळत नसला, तरी माझा देश कमकुवत होत असेल, तर मी माकड बनून जगणार नाही. माझ्यासाठी ‘राष्ट्र प्रथम, राष्ट्र सर्वोत्तम’ आहे. मी याविरुद्ध युद्ध नक्की लढेन!”
या चिमुकलीने शेवटी स्वातंत्र्यदिनाच्या शुभेच्छा देत “जय जवान, जय किसान, जय हिंद, जय महाराष्ट्र” असा जयघोष केला, ज्याने उपस्थितांचं मन जिंकलं.
रोहित पवारांचा टोला
रोहित पवार, जे शेतकरी, बेरोजगारी आणि भ्रष्टाचारासारख्या मुद्द्यांवर सातत्याने आवाज उठवतात, यांनी या व्हिडीओद्वारे सत्ताधाऱ्यांना टोला लगावला आहे. त्यांनी हा व्हिडीओ शेअर करत सत्ताधाऱ्यांना हा संदेश आवर्जून ऐकण्याचा सल्ला दिला आहे. या व्हिडीओने सामान्य जनतेत जागरूकता निर्माण केली असून, लहान मुलीच्या धाडसी आणि प्रेरक विचारांनी अनेकांचं लक्ष वेधलं आहे. ही चिमुकली पुढील पिढीच्या जागरूकतेचं आणि भ्रष्टाचाराविरुद्धच्या लढ्याचं प्रतीक बनली आहे.
