अकोला : शहरात पुन्हा एकदा गुन्हेगारीचे सावट पसरले आहे. काँग्रेसचे ज्येष्ठ नेते विजय कौसल यांचे धाकटे बंधू आणि सार्वजनिक बांधकाम विभागाचे निवृत्त अभियंता संजय कौसल (वय 60) यांची दिवसाढवळ्या हत्या करण्यात आली आहे. या थरारक घटनेमुळे अकोल्यात मोठी खळबळ उडाली आहे.

ही घटना रणपिसे नगरातील मुरलीधर टॉवर परिसरात घडली आहे. महेंद्र पवार असे आरोपीचे नाव आहे. पवार हा सराईत गुन्हेगार असून एका पूर्वीच्या गंभीर प्रकरणात अटकेत होता. सध्या तो जामिनावर बाहेर होता आणि त्याच अवस्थेत त्याने ही हत्या केली.

धारदार हत्यारे वापरून हत्या

महेंद्र पवारने संजय कौसल यांच्या छातीवर आणि डोक्यावर धारदार लोखंडी टिकासने सपासप वार करत त्यांना जागीच ठार मारले. ही संपूर्ण घटना परिसरातील सीसीटीव्ही कॅमेऱ्यात कैद झाली असून पोलिसांनी तपासाची चक्रे वेगाने फिरवली.

जुन्या वादातून हत्या

याबाबत मिळालेल्या प्राथमिक माहितीनुसार, संजय कौसल आणि महेंद्र पवार यांच्यात जुन्या वादाचे वावडे होते. दोघेही त्याच इमारतीत ‘मुरलीधर टॉवर’मध्ये राहत होते. जुन्या वैमनस्यातूनच ही क्रूर हत्या झाल्याचा संशय व्यक्त करण्यात येत आहे.

पोलिसांची जलद कारवाई

या घटनेची माहिती मिळताच पोलिसांनी तात्काळ घटनास्थळी धाव घेतली आणि काही तासांतच महेंद्र पवारला अटक केली. अकोल्याचे नवीन जिल्हा पोलिस अधीक्षक आर्चित चांडक यांनी नुकताच पदभार स्वीकारला असून त्यांच्या कार्यकाळातील पहिल्याच आठवड्यात ही मोठी घटना घडल्याने खळबळ उडाली आहे.

राजकीय आणि सामाजिक स्तरावर संताप

संजय कौसल हे केवळ काँग्रेस नेत्याचे बंधूच नव्हते, तर अकोल्यातील एक आदरणीय, प्रतिष्ठित व्यक्तिमत्त्व होते. त्यांच्या हत्येमुळे स्थानिक पातळीवर संतापाची लाट उसळली असून गुन्हेगारीवर लगाम घालण्याची मागणी जोर धरत आहे.