प्रभात वृत्तसेवा पुणे – पुणे महानगरपालिका आयुक्तांनी आज शेवाळवाडी व मांजरी परिसराला भेट देऊन शहरातील स्वच्छता, ड्रेनेज, रस्त्यांवरील खड्डे, अतिक्रमण आणि नाल्यांमधून वाहणाऱ्या सांडपाण्याच्या समस्या तपासल्या. परिसरातील अस्वच्छता, कचरा ढिगारे आणि अपुरी स्वच्छता पाहून आयुक्तांनी तीव्र नाराजी व्यक्त केली. यावेळी या समस्यांबाबत संबंधित अधिकाऱ्यांकडून समाधानकारक माहिती न मिळाल्यामुळे संतापलेल्या महापालिका आयुक्त नवल किशोर राम यांनी हडपसर क्षेत्रीय कार्यालयाचे सहाय्यक आयुक्त बाळासाहेब ढवळे पाटील यांची बदली करण्याचे प्रशासनास दिले. तर ढवळे यांचा पदभार कार्यकारी अभियंता रवि खंदारे यांच्याकडे देण्यात आला आहे.याशिवाय, यावेळी मलनिःसारण विभागाचे शाखा अभियंता, घनकचरा व्यवस्थापन विभागाचे आरोग्य निरीक्षक आणि मुकादम यांच्यावर कामकाजास समाधानकारक प्रतिसाद न दिल्यामुळे निलंबनाची कारवाई करण्यात आली असल्याची माहिती महापालिकेच्या जनसंपर्क विभागाकडून देण्यात आली. तसेच, यापुढे निष्क्रिय आणि कामचुकार अधिकारी-कर्मचाऱ्यांविरोधात कठोर कारवाई करण्याचे निर्देश दिले. त्यांनी स्पष्ट केले की, यापुढे निष्काळजीपणे काम करणाऱ्या अधिकाऱ्यांवर चौकशी, निलंबन किंवा अकार्यकारी पदावर बदली केली जाणार असल्याचेही सांगितले.या पहाणी वेळी पुणे-सोलापूर महामार्गावरील दुभाजकांमधील अस्वच्छतेबाबतही आयुक्तांनी तीव्र नाराजी व्यक्त करून संबंधित विभागांना तातडीने स्वच्छता सुधारण्यासाठी उपाययोजना करण्याचे आदेश दिले. तसेच, शहरातील अस्वच्छता, वाहतूक कोंडी, ड्रेनेज आणि अतिक्रमणाच्या समस्या दूर करण्यासाठी अधिकाऱ्यांनी प्रभावीपणे काम करण्याच्या सूचनाही संबंधित विभाग प्रमुखांना केल्या आहेत. सलग दुसरी कारवाई दोन दिवसांपूर्वी नगर रोड क्षेत्रीय कार्यालयांतर्गत वाघोली भागात झालेल्या पाहणीदरम्यानही ड्रेनेज व अतिक्रमण समस्यांबाबत निष्क्रियतेमुळे सहाय्यक आयुक्त शीतल वाकडे, उप अभियंता विनायक शिंदे आणि गणेश पुरम यांची तडकाफडकी बदली केली होती. त्यानंतर लगेचच हडपसर क्षेत्रीय कार्यालयाच्या कर्मचाऱ्यांचीही बदली करण्यात आल्याने आयुक्तांचा धसकाच अधिकाऱ्यांनी घेतला आहे.
