चिंबळी : पुणे-नाशिक राष्ट्रीय महामार्गावरील चाकण-भोसरी मार्गावरील कुरुळी, बर्गेवस्ती येथे दुभाजक टाकून बंद करण्यात आलेला रस्ता अखेर ग्रामस्थ, विद्यार्थी आणि स्थानिक हॉटेल व्यावसायिक स्वप्निल बागडे यांच्या विशेष प्रयत्नांमुळे पुन्हा खुला करण्यात आला आहे. रस्ता पूर्ववत सुरू झाल्याने परिसरातील नागरिक, विद्यार्थी, वाहनचालक तसेच व्यावसायिकांनी समाधान व्यक्त केले.

काही दिवसांपूर्वी प्रशासनाच्या वतीने या ठिकाणी रस्ता दुभाजक टाकून मार्ग पूर्णपणे बंद करण्यात आला होता. अचानक रस्ता बंद झाल्याने बर्गेवस्ती परिसरातील नागरिकांची मोठी गैरसोय झाली होती. विशेषतः शाळा-महाविद्यालयात जाणार्‍या विद्यार्थ्यांना महामार्ग ओलांडण्यासाठी मोठा व धोकादायक वळसा घ्यावा लागत होता. त्यामुळे विद्यार्थ्यांच्या सुरक्षिततेचा प्रश्न निर्माण झाला होता.

रस्ता बंद झाल्याचा परिणाम स्थानिक हॉटेल व्यावसायिक तसेच इतर दुकानदारांवरही झाला. ग्राहकांची ये-जा कमी झाल्याने व्यवसायावर परिणाम होऊन व्यावसायिकांचे आर्थिक नुकसान होत होते. नागरिकांची गैरसोय आणि व्यावसायिकांच्या अडचणी लक्षात घेऊन स्वप्निल बागडे यांनी या प्रश्नासाठी पुढाकार घेतला. त्यांनी ग्रामस्थ, महिला आणि विद्यार्थ्यांना एकत्र करून प्रशासनाकडे पाठपुरावा सुरू केला. रस्ता बंद झाल्यामुळे नागरिकांना होणारा त्रास, विद्यार्थ्यांच्या सुरक्षेचा प्रश्न तसेच स्थानिक व्यवसायांवर झालेला परिणाम प्रशासनाच्या निदर्शनास आणून देण्यात आला.

ग्रामस्थांच्या एकजुटीला यश

ग्रामस्थांची एकजूट आणि स्वप्निल बागडे यांच्या सातत्यपूर्ण पाठपुराव्याची प्रशासनाने दखल घेतली. नागरिकांच्या मागणीचा विचार करून संबंधित ठिकाणचा दुभाजक काढण्यात आला आणि रस्ता पुन्हा वाहतुकीसाठी खुला करण्यात आला. रस्ता पुन्हा सुरू झाल्याने कुरुळी बर्गेवस्ती परिसरातील ग्रामस्थ, विद्यार्थी आणि वाहनचालकांनी समाधान व्यक्त केले. तसेच या प्रश्नासाठी पुढाकार घेणारे स्वप्निल बागडे आणि सहकार्‍यांचे ग्रामस्थांनी विशेष आभार मानले.