Satara: पालकमंत्र्यांच्या वाढदिनी पाटण मतदारसंघात स्वच्छता अभियान; शंभूराज देसाई स्वत: हाती घेणार झाडू
Satara वाढदिवसानिमित्त होणारा अनावश्यक खर्चाला टाळून, सामाजिक उपक्रमांना प्राधान्य देण्याची मंत्री देसाई यांची भूमिका आहे. या स्वच्छता मोहिमेतून केवळ परिसराची स्वच्छता नव्हे, तर सार्वजनिक स्वच्छतेविषयी ग्रामस्थांमध्ये जबाबदारीची भावना निर्माण करण्याचा प्रयत्न आहे. लोकप्रतिनिधी स्वतः श्रमदानात सहभागी होणार असल्याने या उपक्रमाला विशेष महत्त्व आले आहे.

Satara: वाढदिवसाचे औचित्य साधून समाजहिताचा संदेश देण्याचा उपक्रम राज्याचे पर्यटन मंत्री आणि जिल्ह्याचे पालकमंत्री शंभूराज देसाई यांनी हाती घेतला आहे. त्यांच्या वाढदिवसानिमित्त मंगळवार, दि. 17 रोजी पाटण विधानसभा मतदारसंघात ग्रामस्वच्छता अभियान राबविण्याचे आवाहन करण्यात आले आहे. या अभियानाची सुरुवात मरळी येथे होणार आहे. शंभूराज देसाई स्वतः हातात झाडू घेऊन, या मोहिमेत सहभागी होणार आहेत.
वाढदिवसानिमित्त होणारा अनावश्यक खर्चाला टाळून, सामाजिक उपक्रमांना प्राधान्य देण्याची मंत्री देसाई यांची भूमिका आहे. या स्वच्छता मोहिमेतून केवळ परिसराची स्वच्छता नव्हे, तर सार्वजनिक स्वच्छतेविषयी ग्रामस्थांमध्ये जबाबदारीची भावना निर्माण करण्याचा प्रयत्न आहे. लोकप्रतिनिधी स्वतः श्रमदानात सहभागी होणार असल्याने या उपक्रमाला विशेष महत्त्व आले आहे.
गावाचा विकास म्हणजे केवळ रस्ते, पाणी, वीज आणि इमारती नसून, स्वच्छता, आरोग्यदायी वातावरणदेखील महत्त्वाचे आहे. गावातील रस्ते, गटारे, पाणवठे, शाळा परिसर, ग्रामपंचायत कार्यालय आणि सार्वजनिक ठिकाणे स्वच्छ ठेवण्यासाठी सामूहिक प्रयत्नांची आवश्यकता आहे. स्वच्छता ही केवळ ग्रामपंचायतीची जबाबदारी नसून प्रत्येक ग्रामस्थाचे कर्तव्य आहे, या दृष्टिकोनातून मतदारसंघातील सर्व ग्रामपंचायतींनी ग्रामस्वच्छता अभियानाचे आयोजन करावे. सरपंच, उपसरपंच, ग्रामपंचायत सदस्य, विविध संस्थांचे पदाधिकारी, सामाजिक कार्यकर्ते, युवक, महिला आणि ग्रामस्थांनी या उपक्रमात सक्रिय सहभाग नोंदवावा, अशी अपेक्षा व्यक्त करण्यात आली आहे. या मोहिमेतून स्वच्छतेविषयी जनजागृतीही करावी, असे आवाहन मंत्री देसाई यांनी प्रसिद्धीपत्रकाद्वारे केले आहे.





