मुंबई : दादरच्या दुकानात प्रथमच डायनिंग रेस्टॉरंट उघडणारे चितळे बंधू मिठाईवाले परदेशात व्यवसाय वाढीवर भर देत आहेत. चितळे बंधू मिठाईवालेचे भागीदार केदार चितळे यांनी ही माहिती दिली. अमेरिकेतील वॉलमार्ट, कॉस्को या सुपर मार्केटमध्ये आपली उत्पादने ठेवली असून, दुबई-युरोपातही भारतीय हॉटेलमध्ये चितळ्यांचे पदार्थ ठेवले जात आहेत. तेथील नागरिकही हे पदार्थ खरेदी करतात.

गुजरात, कर्नाटक, गोवा या राज्यांमध्येही व्यवसाय वाढवण्यावर चितळेंचा भर आहे. तेथील बिगर मराठी जनांमध्ये ही उत्पादने लोकप्रिय झाली आहेत, तर उत्तरेतील चटकदार पदार्थांचे मसाले वेगळे असल्याने मध्य प्रदेशातही वेगळे पदार्थ तयार केले जात आहेत. कुरियरचे भाव वाढण्याबरोबरच अन्नपदार्थांचे भावही वाढतील. त्यामुळे निर्यातीवर काही परिणाम शक्य आहे, असेही चितळे यांनी सांगितले.

मॉडिफाइड ॲटमॉस्फियर टेंपरेचर या पॅकिंगमुळे खाद्यपदार्थांचे आयुष्य एक ते दीड महिना होते. त्यामुळे आता विमानानेदेखील लांबच्या देशात खाद्यपदार्थ निर्यात केले जातात. अळूची भाजी, कटाची आमटी, बटाटा रस्सा, मसालेभात हे खास मराठमोळे पदार्थ वेष्टणबंद पद्धतीने रेडी टू इट स्वरूपात लवकरच आणू, असेही केदार चितळे म्हणाले.