बीजिंग : चीन सध्या अणु बॉम्ब टाकण्याची क्षमता असलेल्या स्टील्थ बॉम्बर फायटर जेट्‌सच्या (युद्ध विमान) निर्मितीचं काम करत आहे. हे स्टील्थ बॉम्बर युद्ध विमान अमेरिकेसाठी धोक्याची घंटा असल्याचं बोललं जात आहे.

या फायटर जेट्‌स चा उपयोग करुन चीन अमेरिकेच्या ठिकाणांवर सहजपणे अणु बॉम्ब टाकू शकणार आहे. त्यामुळेच मोठ्या काळापासून चीन सोबत वाद सुरु असलेल्या अमेरिकेच्या डोकेदुखीत वाढ होण्याची शक्यता आहे.

जियान एच-20 स्ट्रॅटेजिक बॉम्बर फायटर जेट्‌चा कम्प्यूटर जनरेटेड फोटो चीनचा संरक्षण विभाग ‘नोरिन्को’कडून जारी करण्यात आलेत. चीनच्या पुढच्या पीढितील फायटर जेट्‌चा हा पहिलाच फोटो आहे. हे विमान तयार करण्यासाठी चीनकडून अनेक वर्षांपासून प्रयत्न सुरु आहेत.

या फोटोवरुन बॉम्बरमध्ये 4 वेपन बे लावण्यात आल्याचं दिसतंय. याशिवाय 2 अॅडजस्टेबल टेल विंग्स, एक हवाई रडार आणि कॉकपिटच्या दोन्ही बाजूला 2 एअर इनटेक लावण्यात आलेत. याचं डिझाईन अमेरिकेच्या USAF B-2 Spirit सारखं आहे.

‘नोरिन्को’ मॅगझीनच्या फ्रंट कव्हरवर या स्टील्थ बॉम्बरला ‘आकाशातील युद्धदेवता’ असं म्हटलं आहे. चीनचं स्टील्थ बॉम्बर विमानावर गडद रंगाचे रडार-एबसोर्बेंट मटेरियल लावण्यात आलेत. याशिवाय याचं डिझाईन रडारला चकवा देईल असं तयार करण्यात आलंय.

जियान एच-20 स्ट्रॅटेजिक बॉम्बर अण्वस्त्र, हायपरसोनिक आणि क्रूज मिसाईल घेऊन जाण्यास सक्षम आहे. हे विमान जास्तीत जास्त 200 टनापर्यंतचं वजन घेऊन उड्डाण करु शकतं. याचा सर्वाधिक वेग 980 किलोमीटर प्रतितास असेल.

आशिया-प्रशांत महासागर भागातील संरक्षण तज्ज्ञ जॉन ग्रेवेट म्हणाले, या फायटर जेट्‌चे फोटो पाहून या विमानाचा मुख्य हेतू लपून प्रवास करण्याचा दिसतोय. याचा अर्थ हे विमान एक रणनीती म्हणून बॉम्बवर्षावर करत हल्ले करण्यास सक्षम आहे. अशाप्रकारे हे विमान दूरपर्यंत हल्ला करु शकेल.