Chimbli Water Scarcity – खेड तालुक्यातील औद्योगिक दृष्ट्या महत्त्वाच्या चिंबळी परिसरात उन्हाळ्याच्या तीव्रतेमुळे भीषण पाणीटंचाई निर्माण झाली आहे. मे महिन्याच्या अखेरीस वाढलेल्या तापमानामुळे परिसरातील विहिरी, कूपनलिका (बोअरवेल) आणि पारंपरिक जलस्रोत पूर्णपणे कोरडे पडले असून नागरिक, कामगार आणि लघुउद्योजकांना घोटभर पाण्यासाठी संघर्ष करावा लागत आहे.

परिसरातील भूजल पातळी मोठ्या प्रमाणात खालावल्याने पिण्याच्या पाण्याचा प्रमुख स्रोत असलेल्या विहिरी आणि बोअरवेल निकामी झाल्या आहेत. परिणामी ग्रामस्थांना दूरवरून पाणी आणावे लागत असून अनेक भागांत पाण्याचा पुरवठा अत्यंत अपुरा ठरत आहे. चाकण-चिंबळी एमआयडीसी परिसरातील वाढत्या औद्योगिकीकरणामुळे आणि मोठ्या प्रमाणातील कामगारवर्गामुळे पाण्याची मागणी दुप्पट झाली आहे.

मात्र, उपलब्ध पुरवठा अत्यंत तोकडा असल्याने लहान-मोठ्या उद्योगांनाही दैनंदिन कामकाजासाठी पाण्याची मोठी कसरत करावी लागत आहे. दरम्यान, ग्रामस्थ तसेच गृहनिर्माण सोसायट्यांना खासगी टँकरवर अवलंबून राहावे लागत असून त्यासाठी हजारो रुपयांचा अतिरिक्त खर्च सहन करावा लागत आहे.

त्यामुळे सर्वसामान्य नागरिकांचे आर्थिक गणितही बिघडले आहे. स्थानिक नागरिकांनी प्रशासनाकडे तातडीने कायमस्वरूपी उपाययोजना करण्याची मागणी केली असून अतिरिक्त पाणीपुरवठा, नवीन जलस्रोत निर्माण करणे आणि टँकर पुरवठा नियमित करण्याची मागणी जोर धरू लागली आहे.