Chemical Smoke – तालुक्यातील ग्रामीण भागासह पुणे-मुंबई जुन्या महामार्गालगत अवैधरीत्या सुरू असलेल्या भंगार व्यवसायांमुळे नागरिकांच्या आरोग्याशी खेळ होत असल्याचे चित्र पुन्हा एकदा समोर आले आहे. सोमवारी (दि. १६) हाल गावाजवळील भंगार दुकानाला लागलेल्या भीषण आगीमुळे निर्माण झालेला केमिकलयुक्त धूर अजूनही परिसरात कायम असून नागरिकांच्या आरोग्याचा प्रश्न गंभीर बनला आहे. आगीदरम्यान परिसरात दाट धुराचे लोट पसरल्याने भीतीचे वातावरण निर्माण झाले होते. खोपोली नगरपालिका आणि परिसरातील इतर अग्निशमन दलाच्या पथकांनी सुमारे पाच ते सहा तासांच्या अथक प्रयत्नांनंतर आग आटोक्यात आणली. या वेळी तहसीलदार अभय चव्हाण आणि पोलीस निरीक्षक सचिन पवार यांच्या मार्गदर्शनाखाली मदतकार्य करण्यात आले. मात्र आग विझल्यानंतरही केमिकलयुक्त धूर गेल्या चार ते पाच दिवसांपासून परिसरात पसरलेलाच आहे. या धुरामुळे नागरिकांना श्वसनाचा त्रास जाणवत असून, विशेषतः जवळच असलेल्या नामांकित शाळेतील विद्यार्थ्यांनाही याचा फटका बसल्याचे दिसून आले आहे. खालापूर आणि खोपोली परिसरात मोठ्या प्रमाणात भंगार दुकाने असून त्याठिकाणी ज्वलनशील व धोकादायक साहित्य साठवले जात असल्याने अशा घटना वारंवार घडत असल्याची नागरिकांची तक्रार आहे. संबंधित व्यवसायिकांना नेमकी कोणाची परवानगी आहे, असा सवालही आता उपस्थित केला जात आहे. दरम्यान, या प्रकरणात प्रशासनाने तातडीने कारवाई करून नागरिकांच्या आरोग्याचे रक्षण करावे, अशी जोरदार मागणी स्थानिकांकडून होत आहे.
