नवी दिल्ली : देशातील सर्वात मोठी बॅंक असलेल्या स्टेट बॅंक ऑफ इंडियाने आपल्या एका नियमात बदल करत त्यांच्या खातेधारकांना झटका दिला आहे. बॅंकेने आपल्या बचत खात्यावरील व्याज दर कमी करण्याचा निर्णय घेतला आहे. परिणामी एसबीआयच्या कोट्यवधी खातेदारांना मोठा धक्का बसणार आहे.

व्याज दरात कपातीचा नियम एक नोव्हेंबरपासून लागू होईल असे एसबीआयकडून सांगण्यात आले आहे. बॅंक 1 लाख रुपयांच्या ठेवींवर पाव टक्‍क्‍यांनी कपात करणार आहे. परिणामी, नव्या नियमानुसार बचत खातेदारांना 1 लाख रुपयांच्या ठेवीवर मिळणारे व्याज साडेतीन टक्‍क्‍यांवरुन सव्वातीन टक्‍क्‍यांनी मिळणार आहे. म्हणजेच व्याज दरात 0.25 टक्‍क्‍यांनी कपात करण्यात आली आहे. यापूर्वी याच महिन्यात रिझर्व्ह बॅंक ऑफ इंडियाने (आरबीआय) आपल्या रेपो रेटमध्ये कपात केली. त्यानंतर एसबीआयनेही आपल्या व्याज दरात कपात करण्याचा निर्णय घेतला आहे.