Chandrashekhar Bawankule | Sharad Pawar – मारकडवाडी ग्रामस्थांनी कधी राष्ट्रवादीला साथ दिली, कधी अपक्ष तर कधी भाजपाला साथ दिली. त्यामुळे हे गाव कुणा एकाची मक्तेदारी नाही. यावेळी लोकांनी आणि लाडक्या बहिणींनी तुम्हाला नाकारले. त्यामुळे उगाच भ्रम पसरवून ईव्हीएमवर खापर फोडू नका, असे प्रत्‍युत्‍तर भाजपचे प्रदेशाध्‍यक्ष चंद्रशेखर बावनकुळे यांनी ज्‍येष्‍ठ नेते शरद पवार यांना दिले.

मारकडवाडीतील 2014, 2019 आणि 2024 ची मतांची आकडेवारी बावनकुळे यांनी सोशल मीडियावर पोस्ट केली आहे. या पोस्‍टमध्‍ये त्यांनी मतांचा आजवरचा इतिहास सांगत कोणत्या उमेदवाराला किती मते मिळाली आणि कोण पुढे होते, याबाबतची माहिती दिली. तसेच शरद पवारांनी मारकवाडी येथे झालेल्या मतांची आकडेवारी डोळे उघडून वाचावी, असा थेट सल्ला त्‍यांनी दिला.

चंद्रशेखर बावनकुळे यांनी एक्‍स या सोशल मीडिया साइटवर पोस्ट करत म्‍हटले की, शरद पवार साहेब मारकडवाडी येथील ग्रामस्थांनी कायम वेगवेगळ्या पक्षांना साथ दिली. तुमच्या माहितीसाठी 2014, 2019 आणि 2024 ची मतांची आकडेवारी देत आहे.

2014 मध्ये लोकसभा निवडणुकीत राष्ट्रवादी काँग्रेसकडून लढलेल्या विजयसिंह मोहिते पाटील यांना 533 मतं, तर महायुतीतील घटकपक्ष असलेल्या सदाभाऊ खोत यांना 664 मतं मिळाली होती. त्याच वर्षी झालेल्या विधानसभा निवडणुकीत राष्ट्रवादीच्या हनुमंत डोळस यांना 294 मतं मिळाली तर अपक्ष अनंत खंडागळे यांना 979 मतं मिळाली.