Chandrashekhar Bawankule – राज्य सरकारने गेल्या तीन वर्षांत २२ लाख २० हजार ५०० कुणबी, मराठा-कुणबी आणि कुणबी-मराठा जात प्रमाणपत्रे दिली आहेत. या दाखल्यांपैकी केवळ एका दाखल्याबाबत तक्रार आल्यामुळे सात दिवसांत चौकशी करून अहवाल सादर करण्याचे आदेश देण्यात आले होते. कोणताही दाखला रद्द करण्याचे आदेश दिले नव्हते. महसूल खात्याने एकही दाखला रद्द केलेला नाही.

जात वैधता देणे हे सामाजिक न्याय विभागाचे काम असते, महसूल खात्याचे काम फक्त प्रमाणपत्र देणे आहे, असे महसूलमंत्री चंद्रशेखर बावनकुळे यांनी स्पष्ट केले. तसेच, मराठा समाजाचे नेते मनोज जरांगे पाटील यांचा जेंव्हा-जेंव्हा मला फोन आला, तेव्हा मी प्रामाणिकपणे काम करण्याचा प्रयत्न केला. पण, एका पत्रावरून गैरसमज पसरवला गेला, असेही बावनकुळे म्हणाले. नविन प्रशासकीय इमारतीमध्ये आयोजित केलेल्या पत्रकार परिषदेमध्ये ते बोलत होते.

जरांगे पाटील यांच्याकडून सातत्याने होत असलेल्या वैयक्तिक हल्ल्यांवर, शारीरिक व्यंगावरील टीकेवर आणि महसूल खात्यावर केलेल्या आरोपांवर बावनकुळे यावेळी यांनी सविस्तर भाष्य केले. ते म्हणाले की, मी कधीही मराठा विरुद्ध ओबीसी अशा वादात पडलो नाही. मी कोणाबद्दलही आकस ठेवलेला नाही. मला जरांगे पाटलांबद्दल किंवा कोणाबद्दलही वैयक्तिक वाईट बोलायचे नाही.

… तर माझी टिंगलटवाळी करावी
माझ्या शरीरावर, चेहऱ्यावर किंवा व्यंगावर बोलून मनोज जरांगे यांना आनंद मिळत असेल आणि त्यातून समाजाला न्याय मिळणार असेल, तर त्यांनी माझी जरूर टिंगलटवाळी करावी, अशा शब्दांत महसूल मंत्री चंद्रशेखर बावनकुळे मनोज जरांगे यांच्या टीकेचा समाचार घेतला. यावेळी पत्रकार परिषदेमध्ये बावनकुळे हे भावनिक झाल्याचेही पहायला मिळाले.