Chandrakant Patil – श्रीक्षेत्र भंडारा डोंगरावर जगद्गुरू श्री संत तुकाराम महाराजांचे मंदिर उभारण्यात येत आहे. मंदिराच्या अंतिम टप्प्यातील कामांसाठी महाराष्ट्र राज्याचे उच्च शिक्षण मंत्री चंद्रकांत पाटील यांनी रुपये २ कोटींची देणगी देण्याची घोषणा केली आहे. मंदिरासाठी आवश्यक असलेल्या नऊ दरवाजे व सात खिडक्यांसाठी होणारा खर्च मी स्वतः पुढाकार घेऊन लवकरात लवकर ट्रस्टकडे सुपूर्त करेन, असे त्यांनी स्पष्ट केले. संत ज्ञानेश्वर महाराज सप्तशतकोत्तर सुवर्ण महोत्सवी जयंती, संत तुकाराम महाराज त्रिशतकोत्तर अमृत महोत्सवी सदेह वैकुंठगमन सोहळा, संत नामदेव महाराज व संत जनाबाई षष्ठशतकोत्तर अमृत महोत्सवी संजीवन समाधी सोहळा, संत सावता माळी ६३० वी जयंती तसेच तपोनिधी नारायण महाराज त्रिशतकोत्तर प्रकट वर्षानिमित्त श्रीक्षेत्र भंडारा डोंगर ट्रस्टच्या वतीने आयोजित अखंड ज्ञानेश्वरी व गाथा पारायण व कीर्तन महोत्सव सोहळ्याला मंत्री चंद्रकांत पाटील यांनी भेट दिली.यावेळी त्यांनी तुकोबारायांचे दर्शन घेत मंदिराच्या सुरू असलेल्या कामाची पाहणी केली. श्रीक्षेत्र भंडारा डोंगर ट्रस्टचे अध्यक्ष बाळासाहेब काशिद यांच्या हस्ते तुकोबारायांच्या मंदिराची प्रतिमा देऊन मंत्री चंद्रकांत पाटील यांचा सन्मान करण्यात आला. या प्रसंगी भोसरीचे माजी आमदार विलास लांडे, विजय जगताप, छोटे माऊली महाराज कदम, गणेश कळमकर यांच्यासह अनेक मान्यवर उपस्थित होते.