Satara: उत्पादक शेतकऱ्यांच्या उसाला योग्य दर मिळावा, या मागणीसाठी स्वाभिमानी शेतकरी संघटनेच्यावतीने सुरु झालेले चक्काजाम आंदोलन अखेर आज पहाटेनंतर मागे घेण्यात आले आहे. संघटनेचे संस्थापक अध्यक्ष राजू शेट्टी यांनी आंदोलन मागे घेत असल्याची घोषणा रात्री एकच्या सुमारास केली. ऊस उत्पादक शेतकऱ्यांना पहिली उचल प्रतिटन ३ हजार ९०० रुपये देण्यासह गळीत हंगाम संपल्यानंतर प्रतिटन १०० रुपये आणि त्यानंतर आणखी २०० रुपये देण्याचा निर्णय जाहीर करण्यात आला. त्यामुळे पहिल्या उचलीसह अंतिम ऊसदर प्रतिटन ४ हजार २०० रुपये होणार असल्याचे राजू शेट्टी यांनी स्पष्ट केले.

कोल्हापूर, सांगली आणि सातारा या तीन जिल्ह्यांमध्ये एकाच पद्धतीने हा ऊसदराचा पॅटर्न राबविण्यात येणार असल्याचेही त्यांनी जाहीर केले. ऊसदराच्या प्रश्नावर स्वाभिमानी शेतकरी संघटनेने आक्रमक भूमिका घेत चक्काजाम आंदोलन सुरू केले होते. या आंदोलनामुळे सातार ते कोल्हापूरदरम्यानच्या वाहतुकीसह अनेक ठिकाणी वाहतुकीवर परिणाम झाला होता. ऊस उत्पादकांच्या मागण्यांसाठी सुरु असलेल्या या आंदोलनाकडे शेतकरी, साखर कारखानदार आणि प्रशासनाचे लक्ष लागले होते. अखेर ऊसदराच्या प्रश्नावर निर्णय झाल्यानंतर राजू शेट्टी यांनी आंदोलन मागे घेण्याची घोषणा केली. पहिली उचल ३ हजार ९०० रुपये, त्यानंतर हंगाम संपल्यानंतर १०० रुपये आणि पुढे आणखी २०० रुपये, अशा पद्धतीने प्रतिटन एकूण ४ हजार २०० रुपये देण्याचे निश्चित करण्यात आल्याचे त्यांनी सांगितले. या निर्णयामुळे कोल्हापूर, सांगली आणि सातारा जिल्ह्यांतील ऊस उत्पादकांसाठी समान दरपद्धती लागू होणार आहे.

दरम्यान, चक्काजाम आंदोलनामुळे प्रवाशांना तसेच परप्रांतीय वाहतूकदारांना झालेल्या गैरसोयीबद्दल राजू शेट्टी यांनी दिलगिरी व्यक्त केली. आंदोलनाच्या काळात वाहतूक अडकल्याने प्रवाशांना आणि वाहनचालकांना त्रास सहन करावा लागला. त्याबद्दल त्यांनी संबंधितांची जाहीर माफी मागितली. शेतकऱ्यांच्या प्रश्नासाठी आंदोलन करीत असताना सर्वसामान्य प्रवासी आणि वाहतूकदारांना झालेल्या त्रासाची त्यांनी दखल घेतली. त्याचबरोबर आंदोलनाच्या काळात कायदा व सुव्यवस्था राखण्यासाठी सहकार्य करणाऱ्या पोलिसांचेही त्यांनी आभार मानले.

राजू शेट्टी यांनी चक्काजाम आंदोलन मागे घेतल्याची घोषणा केल्यानंतर त्याबाबतचा अधिकृत निरोप स्वाभिमानी शेतकरी संघटनेचे सातारा जिल्हाध्यक्ष राजू शेळके यांना देण्यात आला. त्यानंतर सातारा जिल्ह्यातील नागठाणे येथे सुरु असलेले चक्काजाम आंदोलन मागे घेण्याची कार्यवाही सुरू झाली. आंदोलनामुळे दोन्ही बाजूंनी थांबलेली वाहतूक पूर्ववत करण्यासाठी कार्यकर्ते आणि पोलिसांकडून प्रयत्न सुरू करण्यात आले. नागठाणे परिसरातील वाहतूक सुरळीत करण्याच्या दृष्टीने रस्त्यावरील अडथळे दूर करण्याची प्रक्रिया हाती घेण्यात आली.
ऊसदराच्या मागणीसाठी सुरू झालेल्या चक्काजाम आंदोलनाची अखेर राजू शेट्टी यांच्या घोषणेनंतर सांगता झाली. तीन जिल्ह्यांसाठी एकच ऊसदर पॅटर्न निश्चित झाल्याने आंदोलन मागे घेण्यात आल्याने नागठाणे परिसरासह अन्य ठिकाणची वाहतूक पूर्ववत होण्याचा मार्ग मोकळा झाला आहे.