Chakan Traffic – महाराष्ट्राच्या औद्योगिक प्रगतीचा कणा असलेल्या चाकण एमआयडीसी क्षेत्रातील उद्योजकांच्या समस्या सोडवण्यासाठी आणि पायाभूत सुविधांचा कायापालट करण्यासाठी राज्य सरकारने हालचाली तीव्र केल्या आहेत. चाकणमधील वाहतूककोंडीसह इतर अडचणींवर कायमस्वरूपी मार्ग काढण्यासाठी उद्योगमंत्री उदय सामंत यांनी पुढाकार घेतला असून,

रविवारी (१६ ऑगस्ट) स्थानिक पातळीवर उच्चस्तरीय बैठकीचे आयोजन करण्यात आले आहे. चाकणमधील लघू व मध्यम उद्योगांच्या (एमएसएमई) समस्यांची गांभीर्याने दखल घेत, उद्योगमंत्र्यांनी उद्योजकांशी दूरध्वनीवरून संवाद साधला. केवळ ‘डॅमेज कंट्रोल’ न करता प्रत्यक्ष ‘ऑन-द-स्पॉट’ निर्णय घेण्यासाठी ही विशेष बैठक बोलावण्यात आली आहे.

या बैठकीला एमआयडीसीचे मुख्य कार्यकारी अधिकारी दीपेंद्रसिंह कुशवाह, पुणे जिल्हाधिकारी जितेंद्र डुडी, ‘पीएमआरडीए’चे महानगर आयुक्त डॉ. अभिजित चौधरी, तसेच राष्ट्रीय महामार्ग प्राधिकरण (एनएचएआय), सार्वजनिक बांधकाम विभाग व वाहतूक पोलिसांचे उच्चाधिकारी उपस्थित राहणार आहेत.

वाहतूककोंडी, रस्ते, वीज आणि पाणीपुरवठा सुरळीत करण्यासाठी सर्व प्रशासकीय यंत्रणा एकत्रितपणे काम करणार आहेत. या भागातील दररोजची १,००० कोटी रुपयांची उलाढाल आणि हजारो कामगारांचा रोजगार सुरक्षित ठेवण्यासाठी शासन कटिबद्ध असल्याचे सांगण्यात आले. ‘स्मॉल स्केल इंडस्ट्रिज असोसिएशन’ आणि ‘फेडरेशन ऑफ चाकण इंडस्ट्रिज’च्या मागण्यांवर प्रत्यक्ष अंमलबजावणीची तयारी सुरू झाली आहे.

वाहतूककोंडीचा प्रश्न सोडवण्यासाठी ३१ ऑगस्टपर्यंतचा कृती आराखडा तयार करण्यात आला असून, त्यात प्रमुख रस्ते आणि महामार्गांवरील खड्डे तातडीने बुजवून वाहतूक सुरळीत करणे, रस्त्यांच्या दुतर्फा असलेली अनधिकृत अतिक्रमणे हटवून रस्ते मोकळे करणे, अवजड वाहनांचे अनधिकृत पार्किंग रोखण्यासाठी विशेष पोलीस तुकड्या तैनात करणे आदींचा समावेश आहे.