नवी दिल्ली: केंद्रीय माध्यमिक शिक्षण बोर्ड (CBSE) कडून आज इयत्ता दहावी आणि बारावी बोर्ड परीक्षा २०२६ साठीचे अंतिम वेळापत्रक (Final Date Sheet) जारी करण्यात आले आहे. सीबीएसईच्या अधिकृत अधिसूचनेनुसार, इयत्ता १०वी आणि १२वीच्या बोर्ड परीक्षा १७ फेब्रुवारी, २०२६ पासून सुरू होणार आहेत. या परीक्षांची तयारी करणाऱ्या उमेदवारांसाठी ही एक अत्यंत महत्त्वाची माहिती आहे.

परीक्षा कालावधी:

इयत्ता दहावीची बोर्ड परीक्षा १७ फेब्रुवारी २०२६ पासून सुरू होऊन १० मार्च २०२६ पर्यंत चालणार आहे.

इयत्ता बारावीची बोर्ड परीक्षा १७ फेब्रुवारी २०२६ पासून सुरू होऊन ०९ एप्रिल २०२६ पर्यंत आयोजित केली जाणार आहे.

परीक्षेचे वेळापत्रक (Date Sheet) बोर्डाच्या अधिकृत वेबसाइट www.cbse.gov.in वरून विद्यार्थी डाउनलोड करू शकतात.

परीक्षेची वेळ आणि स्वरूप –
सीबीएसईच्या अधिकृत अधिसूचनेनुसार, दहावी आणि बारावीची बोर्ड परीक्षा केवळ एकाच शिफ्टमध्ये आयोजित केली जाईल. परीक्षेची वेळ सकाळी १०.३० वाजल्यापासून ते दुपारी १.३० वाजेपर्यंत अशी असेल.

याव्यतिरिक्त, बोर्डाने हे देखील स्पष्ट केले आहे की नवीन राष्ट्रीय शिक्षण धोरण (NEP-2020) नुसार, इयत्ता दहावीसाठी यापुढे वर्षातून दोनदा बोर्ड परीक्षा आयोजित केली जाईल.

११० दिवसांपूर्वी वेळापत्रक जाहीर –
सीबीएसईने स्पष्ट केले आहे की, बोर्ड परीक्षा सुरू होण्याच्या तब्बल ११० दिवस आधी अंतिम वेळापत्रक जारी करण्याची ही पहिलीच वेळ आहे. बोर्डाच्या मते, यामुळे विद्यार्थी आणि शाळांना अनेक लाभ होतील. विद्यार्थी बोर्ड परीक्षेची तयारी लवकर सुरू करू शकतील आणि त्यांच्या कामगिरीत सुधारणा करू शकतील. सर्व शाळांना बोर्डाच्या वर्गांसाठी उत्तम आणि प्रभावी नियोजन करणे शक्य होईल.

विद्यार्थ्यांना दिनदर्शिका अद्ययावत करण्याचा सल्ला –
सीबीएसईने इयत्ता १०वी आणि १२वीच्या बोर्ड परीक्षेचे वेळापत्रक जारी केले असल्यामुळे, उमेदवारांना त्यांच्या परीक्षा दिनदर्शिका (Exam Calendar) त्वरित अद्ययावत (Update) करण्याचा सल्ला देण्यात आला आहे. दहावीच्या बोर्ड परीक्षेत काही महत्त्वाचे बदल करण्यात आले आहेत, हे लक्षात घेऊन विद्यार्थ्यांनी तयारी करावी.