पिंपरी – सवलतीच्या प्रवासासाठी कार्ड घेतले. मात्र, प्रवासाच्या वेळी तेच कार्ड अ‍ॅक्टिव्ह नसल्याचे सांगण्यात आले. त्यासाठी पुन्हा १०० रुपये भरा, असे सांगितले गेले. पूर्ण तिकिटाचे पैसे नसल्याने काही महिलांना बसमधून खाली उतरावे लागले. ज्येष्ठ नागरिकांचीही धावपळ झाली.

अचानक लागू केलेल्या ‘एनसीएमसी’ कार्ड अ‍ॅक्टिव्हेशनच्या नियमामुळे एसटी प्रवाशांची मोठी गैरसोय होत आहे. महामंडळाच्या नियोजनावर प्रवाशांकडून संताप व्यक्त होत आहे.

वल्लभनगर आगारात या प्रकारामुळे प्रवाशांची गर्दी वाढली आहे. सकाळपासूनच कार्ड अ‍ॅक्टिव्हेशनसाठी रांगा लागत आहेत. अनेक प्रवासी लांब पल्ल्याच्या प्रवासासाठी आगारात येतात.

बसमध्ये बसल्यानंतर सवलतीच्या तिकिटासाठी एनसीएमसी कार्ड मागितले जाते. कार्ड नसल्यास किंवा अ‍ॅक्टिव्ह नसल्यास सवलत नाकारली जाते. त्यामुळे प्रवासी आणि वाहकांमध्ये वादाचे प्रसंग निर्माण होत आहेत.

कार्ड घेतले; पण अ‍ॅक्टिव्हेशनची माहितीच नाही
अनेक नागरिकांनी २०० रुपये खर्च करून एनसीएमसी कार्ड घेतले. महा-ई-सेवा केंद्रे आणि आगारातून ही कार्डे काढण्यात आली. १ सप्टेंबरपासून कार्डवर सवलतीचा प्रवास करता येईल, अशी प्रवाशांची अपेक्षा होती. मात्र, प्रत्यक्ष बसमध्ये वेगळाच अनुभव आला.

कार्ड अ‍ॅक्टिव्ह करण्यासाठी आणखी १०० रुपये भरावे लागतील, असे सांगण्यात आले. या प्रक्रियेची माहिती कार्ड घेताना स्पष्टपणे देण्यात आली नसल्याच्या तक्रारी आहेत. त्यामुळे प्रवाशांना अचानक आर्थिक भुर्दंड सहन करावा लागत आहे. सवलतीच्या प्रवासावर अवलंबून असलेल्या अनेक महिला एसटीने प्रवास करतात. त्यांच्याकडे पूर्ण तिकिटासाठी पुरेसे पैसे नसतात.

अशा वेळी कार्ड अ‍ॅक्टिव्ह नसल्याचे सांगितले जाते. पूर्ण तिकीट घेण्यास पैसे नसल्यास काही महिलांना प्रवासादरम्यान खाली उतरवण्यात आल्याच्या तक्रारी आहेत. त्यात ज्येष्ठ महिलांचाही समावेश आहे. त्यामुळे महिलांच्या सुरक्षिततेचा प्रश्नही ऐरणीवर आला आहे. प्रवाशांनी एसटी प्रशासनाच्या या पद्धतीवर नाराजी व्यक्त केली आहे.

अ‍ॅक्टिव्हेशन केंद्रांवरही गर्दी
बसप्रवासात अडचण आल्यानंतर नागरिक आता कार्ड अ‍ॅक्टिव्ह करण्यासाठी केंद्रांकडे धाव घेत आहेत. वल्लभनगर आगारासह विविध केंद्रांवर रांगा लागत आहेत. काही ठिकाणी सर्व्हरची समस्या असल्याची तक्रार आहे. इंटरनेटचा वेग कमी असल्याने प्रक्रियेला वेळ लागत आहे.

ज्येष्ठ नागरिकांना बराच वेळ रांगेत उभे राहावे लागत आहे. महिलांनाही गर्दीचा त्रास सहन करावा लागत आहे. त्यामुळे एकीकडे बसमध्ये सवलत नाकारली जाते. दुसरीकडे कार्ड अ‍ॅक्टिव्ह करण्यासाठी पुन्हा रांगेत उभे राहावे लागते.

नियमापूर्वी जनजागृती का नाही?
नवीन नियम लागू करण्यापूर्वी एसटी महामंडळाने प्रवाशांना स्पष्ट माहिती देणे अपेक्षित होते. कार्ड काढताना अ‍ॅक्टिव्हेशनसाठी स्वतंत्र शुल्क लागणार आहे, याची माहिती देणे गरजेचे होते.

आगारातही ठळक सूचना लावणे आवश्यक होते. अचानक नियम लागू केल्याने प्रवाशांची कोंडी झाली आहे. विशेषतः सवलतीच्या प्रवासावर अवलंबून असलेल्या महिला आणि ज्येष्ठ नागरिकांना त्याचा फटका बसत आहे.

जुनी पद्धत तात्पुरती सुरू ठेवण्याची मागणी
सर्व प्रवाशांची कार्डे अ‍ॅक्टिव्ह होईपर्यंत जुन्या ओळखपत्रांवर सवलत सुरू ठेवावी, अशी मागणी होत आहे. नवीन नियमाबाबत पुरेशी जनजागृती करावी. अ‍ॅक्टिव्हेशन प्रक्रिया सुलभ करावी. केंद्रांची संख्या वाढवावी. तांत्रिक अडचणी तातडीने दूर कराव्यात, अशीही प्रवाशांची मागणी आहे.

प्रवाशांना सुविधा देण्यासाठी सुरू केलेले स्मार्ट कार्डच जर त्यांच्या गैरसोयीचे कारण ठरत असेल, तर त्याच्या अंमलबजावणीवर प्रश्नचिन्ह निर्माण होते. त्यामुळे एसटी महामंडळाने तातडीने हस्तक्षेप करून प्रवाशांना दिलासा द्यावा, अशी अपेक्षा व्यक्त होत आहे.

Online Games: मनोरंजनाच्‍या नावाखाली मुलांच्‍या मनाशी खेळ; कार्टून, आॅनलाइन गेम्‍सने आक्रमक मनोवृत्ती