पुणे  – कोयता गँग, ड्रग्ज, ससून रुग्णालयातील ड्रग्ज प्रकरण यामुळे कॅन्टोन्मेंटवर डाग लागला आहे. सभ्य पुणे शहर भाजपमुळे बदनाम झाले आहे, अशी टीका शिवसेना उद्धव बाळासाहेब ठाकरे पक्षाचे खासदार आणि महाविकास आघाडीचे नेते संजय राऊत यांनी केली.

कॅन्टोन्मेंटची प्रतिमा बदलण्यासाठी बदल झालाच पाहिजे. पुणे कॅटोन्मेंट विधानसभा मतदारसंघाला लागलेले ग्रहण दूर करण्याची वेळ आली आहे. रमेश बागवे मोठ्या फरकाने विजयी होणार आहेत, असा विश्वास त्यांनी व्यक्त केला. कँटोन्मेंट विधानसभा मतदारसंघातील काॅंग्रेस महाविकास आघाडीचे उमेदवार बागवे यांच्या प्रचारार्थ शिवसेना पदाधिकारी व कार्यकर्त्यांच्या बैठकीत ते बोलत होते.

काँग्रेसचे मोहन जोशी, राष्ट्रवादी काँग्रेस शरदचंद्र पवार पक्षाचे अंकुश काकडे, शिवसेना उद्धव बाळासाहेब ठाकरे पक्षाचे संजय मोरे, माजी नगरसेवक अविनाश बागवे, विशाल धनवडे, पल्लवी जावळे, प्राची आल्हाट, तसेच डॉ. अमोल देवळेकर आणि जावेद शेख यांच्यासह महाविकास आघाडीतील घटकपक्षांचे पदाधिकारी, कार्यकर्ते मोठ्या संख्येने उपस्थित होते.

कॅन्टोन्मेंटमधील विविध जाती- धर्मांच्या समाजात फूट पाडण्याचे काम भाजपने केले आहे. लोक या खोके सरकारला कंटाळले असून, महाविकास आघाडी सरकार येणार, ही काळ्या दगडावरची रेघ आहे. या मतदारसंघाचे नेतृत्व शिवसेनेने केले आहे. आता रमेशदादांना निवडून द्यायचे आहे, असे आवाहन राऊत यांनी केले.

हॉलिवूड गुरुद्वाराला बागवेंची भेट

दरम्यान, गुरू नानक जयंतीनिमित्त रमेश बागवे यांनी कॅम्पमधील प्रसिद्ध हॉलिवूड गुरुद्वारा येथे शुक्रवारी भेट दिली. गुरुद्वारा येथे दर्शन घेऊन शीख बांधवांना गुरू नानक जयंतीच्या शुभेच्छा त्यांनी दिल्या. या वेळी शीख बांधवांनी रमेश बागवे यांचे स्वागत करून त्यांचा विजय निश्चित असल्याचा विश्वास दिला.