C. P. Radhakrishnan : भारताचे प्राचीन ज्ञान केवळ हस्तलिखिते आणि ग्रंथालयांपुरते मर्यादित न राहता त्याचे जतन, अभ्यास, अर्थनिर्वचन आणि पुढील पिढ्यांपर्यंत प्रसार झाला पाहिजे, असे उपराष्ट्रपती सी. पी. राधाकृष्णन (C. P. Radhakrishnan) यांनी मंगळवारी सांगितले.

श्री लाल बहादूर शास्त्री राष्ट्रीय संस्कृत विद्यापीठाच्या दुसऱ्या दीक्षांत समारंभाला संबोधित करताना त्यांनी भारताच्या प्राचीन ज्ञानपरंपरेचे महत्त्व अधोरेखित केले. आपले ‘महान ग्रंथ’ नष्ट होऊ देता कामा नयेत आणि ते भावी पिढ्यांसाठी जतन करणे आवश्यक असल्याचे त्यांनी नमूद केले.

राष्ट्रीय शैक्षणिक धोरण-२०२० मध्ये भारतीय ज्ञान प्रणालीवर देण्यात आलेल्या भरामुळे या प्रयत्नांना अधिक बळ मिळाल्याचे उपराष्ट्रपती राधाकृष्णन (C. P. Radhakrishnan) यांनी सांगितले.

विज्ञान, साहित्य आणि तत्त्वज्ञानाच्या क्षेत्रात संस्कृतला गौरवशाली स्थान असल्याचे सांगत त्यांनी या भाषेच्या संवर्धनावर भर दिला. संस्कृत ही नैतिक मूल्यांचा भक्कम पाया असून तिने विविध कलांना समृद्ध केले आहे, असे ते म्हणाले. संस्कृतने भारताच्या आत्म्याला आणि भावनेला एकत्र बांधणाऱ्या धाग्याची भूमिका बजावली असल्याचेही उपराष्ट्रपतींनी नमूद केले.

या भाषेत मानवजातीसाठी उपयुक्त ठरू शकणारे असंख्य विषय आणि ज्ञानसंपदा आहे. अनेक नव्या संधींची दारे उघडण्याची ‘गुरुकिल्ली’ संस्कृतमध्ये असल्याचे त्यांनी सांगितले. प्राचीन ज्ञानाचे आधुनिक संदर्भात अध्ययन आणि त्याचा व्यापक प्रसार केल्यास या वारशाचा लाभ भावी पिढ्यांना मिळू शकतो, असेही त्यांनी (C. P. Radhakrishnan) स्पष्ट केले.