C.P.Radhakrishnan : पंतप्रधान नरेंद्र मोदी यांनी सेवा आणि राष्ट्र प्रथम या तत्त्वांना प्रशासनाच्या केंद्रस्थानी ठेवले आहे. हे धोरण राष्ट्रीय स्वयंसेवक संघाच्या नि:स्वार्थ सेवा आणि राष्ट्रनिर्मितीवरील आग्रहाचेच प्रतिबिंब आहे, असे प्रतिपादन उपराष्ट्रपती सी. पी. राधाकृष्णन (C.P.Radhakrishnan) यांनी शुक्रवारी सांगितले.

श्याम जाजू आणि अनुपम त्रिवेदी यांनी लिहिलेल्या आरएसएस @१००: अ सेंच्युरी ऑफ सर्व्हिस, युनिटी अँड सॅक्रिफाईस या पुस्तकाच्या प्रकाशन सोहळ्यात उपराष्ट्रपती राधाकृष्णन (C.P.Radhakrishnan) बोलत होते. अ स्वयंसेवक ॲज पीएम: द मोदी एरा या प्रकरणाचा उल्लेख करत राधाकृष्णन म्हणाले की, हे पुस्तक मोदींचा संघस्वयंसेवक ते प्रधान सेवक असा प्रवास मांडते.

केंद्रीय संरक्षण मंत्री राजनाथ सिंह यांच्याशी झालेल्या संभाषणाची आठवण सांगताना उपराष्ट्रपती (C.P.Radhakrishnan) म्हणाले की, दोघांनीही जयप्रकाश नारायण यांच्या संपूर्ण क्रांती या चळवळीतून प्रेरित होऊन तळागाळातील कार्यकर्ते म्हणून आपल्या सार्वजनिक जीवनाची सुरुवात केली होती. संघाची तुलना गंगा नदीशी करत त्यांनी सांगितले की, अत्यंत सामान्य परिस्थितीतून सुरुवात करून ही संस्था आज जगातील सर्वात मोठ्या स्वयंसेवी संस्थांपैकी एक बनली आहे.

उपस्थितांना संबोधित करताना राधाकृष्णन (C.P.Radhakrishnan) म्हणाले की, राष्ट्रीय स्वयंसेवक संघाच्या शताब्दीनिमित्त प्रकाशित होणाऱ्या या पुस्तकाचे प्रकाशन करणे ही माझ्यासाठी वैयक्तिक सन्मानाची बाब आहे, कारण या संस्थेशी त्यांचा दीर्घकाळापासून संबंध राहिला आहे.

संघावरील एका तमिळ कवितेचा संदर्भ देत ते म्हणाले की, त्यात या संघटनेची तुलना  गंगेसोबत केली आहे, जी निस्वार्थ सेवेच्या भावनेचे प्रतीक आहे. भारताची सांस्कृतिक मुळे, वारसा आणि परंपरांचे पुनरुज्जीवन व सक्षमीकरण करण्यातील आरएसएसची भूमिका या पुस्तकात मांडण्यात आली आहे.