Union Budget 2025: केंद्रीय बजेट 2025-26 लवकरच सादर केला जाणार आहे. या बजेटकडे मध्यमवर्गीय नागरिक डोळे लावून बसले आहेत. सातत्याने करात होणारी वाढ, महागाई यामुळे या बजेटमधून दिलासा मिळावा अशी सर्वसामान्यांची इच्छा आहे. 1 फेब्रुवारीला केंद्रीय अर्थमंत्री बजेट सादर करणार आहेत. बजेट निर्मितीची प्रक्रिया सुरू झाली असून, तुम्ही यासंदर्भात तुम्हाला हव्या असलेल्या सूचना देऊ शकता.

तुम्हाला बजेटमध्ये कोणत्या गोष्टी हव्या आहेत, कोणते बदल करायला हवेत, कोणत्या योजना राबवाव्यात यासंदर्भातील सुचना सरकारपर्यंत पोहोचवू शकता. केंद्रीय बजेटआधी सरकार वेगवेगळ्या वर्गाकडून मते मागवत असते. वेगवेगळ्या क्षेत्रातील प्रतिनिधी, उद्योगपती, शेतकरी अशा अनेकांकडून बजेटबाबत मते मागवली जातात.

तुम्ही देखील बजेटसंदर्भात तुमच्या सूचना पाठवू शकता. 10 जानेवारीपासून सर्वसामान्य नागरिकांना सूचना पाठवता येतील. नागरिकांनी MyGov प्लॅटफॉर्मच्या (www.mygov.in) माध्यमातून त्यांच्या नाविन्यपूर्व व उपयुक्त सुचना पाठवाव्यात असे अर्थमंत्रालयाने म्हटले आहे.

सध्या आगामी बजेट तयार करण्याच्या प्रक्रियेला सुरुवात झाली आहे. अर्थमंत्री निर्मला सीतारामन यांनी शेतकरी संघटना, कृषि अर्थतज्ञ, ट्रेड यूनियन्स आणि MSME सह विविध क्षेत्रातील प्रतिनिधींशी याबाबत चर्चा केली.

दरम्यान, 1 फेब्रुवारीला केंद्रीय बजेट सादर केले जाणार आहे. वाढत्या कराच्या दरामुळे सर्वसामान्यांकडून सातत्याने नाराजी व्यक्त केली जात आहे. त्यामुळे यामध्ये सरकार बदल करणार की कराचे दर तसेच ठेवणार हे पाहणे महत्त्वाचे ठरेल.