कोंढवा – हडपसर विधानसभा मतदारसंघांमध्ये मला मानणारा शिवसैनिक व मतदार वर्ग मोठा आहे. महादेव बाबर आणि मी आम्ही दोघेही निष्ठावंत शिवसैनिक आहोत. त्यामुळे मतदारांनी गंगाधर बधे यांना महादेव बाबर समजूनच बहुसंख्येने मतदान करावे, असे आवाहन माजी आमदार महादेव बाबर यांनी पत्रकार परिषदेत केले. अपक्ष उमेदवार गंगाधर बधे यांच्या समर्थनार्थ माजी आमदार बाबर यांनी पत्रकार परिषदेचे आयोजन केले होते. यावेळी महादेव बाबर बोलत होते. हडपसर मतदार संघामध्ये शिवसेनेची मोठी ताकद आहे. पुन्हा एकदा उद्धव बाळासाहेब ठाकरे यांना मुख्यमंत्री करण्याकरीता आम्ही शिवसैनिक गंगाधर बधे यांना अपक्ष म्हणून निवडणुकीमध्ये उभे केले आहे. मतदारसंघांमध्ये मी आमदार असतानाच मांजरी रेल्वे उड्डाणपूल करणे, महादेवनगर परिसरासाठी महाराष्ट्र जीवन प्राधिकरण योजनेची पेयजल योजना पाठपुरावा करून मंजूर केली. आता, सोलापूर रोडला पर्यायी रस्ता करणे, हडपसर रामटेकडी भागांमध्ये संपूर्ण पुणे शहराचा कचरा आणून टाकला जात आहे ते हटवणे हे आमचे ध्येय आहे. मुंढवा येथे जनावरांचा प्रकल्प आणून हडपसरची दयनीय अवस्था करून ठेवली आहे. मतदारसंघांमध्ये महादेव बाबर यांचे नाव एक नंबरला होते, त्यामुळे मतदारसंघातील अदृश्य कार्यकर्त्यांचे हात गंगाधर बधे यांनाच मदत करणार आहेत. सर्वात चर्चेत असलेला मेट्रोचा प्रश्न हा आजही कागदावरच आहे. मुळात मी महापालिकेचा गटनेता होतो तेव्हा दिल्लीला जाऊन शिवसेनेच्या वतीने पुणे शहरात मेट्रो आणण्याचा प्रस्ताव आम्हीच सादर केला होता. अपक्ष उमेदवार गंगाधर बधे यांनी सांगितले की, माजी आमदार महादेव बाबर यांच्या मार्गदर्शनाखाली निवडणूक लढवत आहे. मागील ३० ते ४० वर्षांपासून शिवसेनेत काम करीत आहे, त्यासोबत वेगवेगळ्या कष्टकरी वर्गांना व सर्व धर्मातील नागरिकांना मदत करण्याचे काम सुद्धा मी केले आहे. मतदारसंघांमध्ये निष्ठेने हडपसरचा विकास करण्यासाठी आम्ही दोघांचा पुढाकार आहे. मतदारांना विनंती आहे हडपसरच्या विकास करण्याकरिता एअर कंडिशनर या चिन्ह समोरील बटन दाबून मला बहुसंख्य मतांनी विजयी करावे.
