Pune News – उन्हाळ्याची चाहूल लागताच शहरात पुन्हा पाणीटंचाईचे सावट गडद झाले असून, हडपसर परिसरातील पिण्याच्या पाण्याच्या गंभीर प्रश्नावरून शिवसेनेने बुधवारी महापालिकेवर भव्य हंडा मोर्चा काढत प्रशासनाला धारेवर धरले. शहरप्रमुख प्रमोद नाना भानगिरे यांच्या नेतृत्वाखाली काढण्यात आलेल्या या आंदोलनात मोठ्या संख्येने महिला, नागरिक आणि शिवसैनिक सहभागी झाले होते. महिलांनी महापालिकेच्या प्रवेशद्वारासमोर माठ फोडून प्रशासनाच्या निष्क्रियतेचा तीव्र निषेध नोंदवला. या वेळी घोषणांनी परिसर दणाणून गेला.हडपसर मतदारसंघातील प्रभाग क्रमांक ४१, तसेच परिसरात पिण्याच्या पाण्याची तीव्र टंचाई निर्माण झाली आहे. महापालिकेने विविध ठिकाणी पाण्याच्या टाक्या उभारल्या असल्या, तरी त्या टाक्यांमध्ये नियमित आणि पुरेशा प्रमाणात पाणीपुरवठा होत नसल्याने अनेक टाक्या रिकाम्याच आहेत. याबाबत शिवसेनेच्या वतीने प्रशासनाकडे वारंवार पाठपुरावा करण्यात आला. मात्र, परिस्थितीत कोणताही बदल न झाल्याने संतप्त झालेल्या शिवसैनिकांनी महापालिकेच्या मुख्य प्रवेशद्वारावर हंडा मोर्चा काढून जोरदार आंदोलन केले. टाक्या उभारल्या चौकात, पाणी नाही नळात, अशा घोषणा देण्यात आल्या. आंदोलनादरम्यान पाणीटंचाईची तीव्रता दाखवून देण्यासाठी महापालिकेच्या प्रवेशद्वारासमोर टँकर उभा करून प्रतीकात्मक निदर्शने करण्यात आली. या वेळी महिलांनी माठ फोडून प्रशासनाच्या दुर्लक्षाचा निषेध नोंदवला. आंदोलनात स्वाती टकले, राकेश झांबरे, मच्छिंद्र दगडे, अमर घुले, सुभाष घुले, मिलिंद अहिरे, अभिमन्यू भानगिरे, सचिन तरवडे, प्रवीण हिलगे, पंकज कोंद्रे, अभिजीत बोराटे यांच्यासह शिवसेनेचे पदाधिकारी, कार्यकर्ते, नागरिक मोठ्या संख्येने उपस्थित होते.
