Shivsena Vardhapan din 2026 : शिवसेना (उद्धव बाळासाहेब ठाकरे) पक्षातील सहा खासदारांच्या बंडखोरीनंतर राज्यातील राजकीय वातावरण अधिक तापले आहे. गुरुवारी दिल्लीत झालेल्या ठाकरेंच्या शिवसेनेच्या संसदीय दलाच्या बैठकीला पक्षाचा व्हीप धुडकावून 6 खासदार अनुपस्थित राहिले. यानंतर एकनाथ शिंदेंचं ऑपरेशन टायगर यशस्वी झाल्याचं स्पष्ट झालं. चार वर्षानंतर ठाकरेंच्या शिवसेनेला पुन्हा मोठा धक्का बसला आहे.

या राजकीय घडामोडी घडत असताना आज 19 जून रोजी दोन्ही शिवसेनेकडून दोन वेगवेगळ्या ठिकाणी वर्धापन दिन साजरा करण्यात येणार आहे. आता दोन्ही पक्षातील पक्षप्रमुख नेमकं काय बोलणार? बंडखोरीबाबतठाकरे गट काय भूमिका घेणार? सहा खासदार नेमक्या कोणत्या शिवसेनेत पाहायला मिळणार? या सर्व गोष्टींकडे अनेकांचे लक्ष लागले आहे.

कोठे होणार दोन्ही शिवसेनेचा वर्धापन दिन साजरा? 

दरम्यान, गोरेगाव येथील नेस्को सेंटरमध्ये शिवसेना शिंदे गटाकडून पक्षाचा 60 वा वर्धापन दिन साजरा करण्यात येणार आहे. त्यासाठी भव्य स्वरूपाची तयारी देखील करण्यात आली असून मुंबई, ठाणेसह इतर शहरांमध्ये जोरदार बॅनरबाजी करण्यात आली आहे.

तर दुसरीकडे, शिवसेना (उद्धव बाळासाहेब ठाकरे) गटाचा वर्धापन दिनाचा कार्यक्रम सायन येथील षण्मुखानंद सभागृहात होणार आहे. या कार्यक्रमासाठीही पक्षाकडून जोरदार तयारी सुरू असून, मोठ्या संख्येने शिवसैनिक उपस्थित राहण्याची शक्यता आहे.

आगामी राजकीय घडामोडींच्या पार्श्वभूमीवर दोन्ही गटांच्या नेत्यांची भाषणे आणि भूमिका महत्त्वाची ठरणार आहेत. दरम्यान, याआधी ठाकरे गटाचे खासदार संजय राऊत आणि अरविंद सावंत यांनी बंडखोर खासदारांबाबत संताप व्यक्त केला आणि आता उद्धव ठाकरे आजच्या कार्यक्रमात काय बोलणार हे पहावे लागेल. याशिवाय एकनाथ शिंदे देखील ऑपरेशन टायगरबाबत काय खुलासा करणार हे पाहणं महत्त्वाचं ठरेल.

हेही वाचा: 

SPPU Mess: पुणे विद्यापीठाच्या मेसचा परवाना निलंबित! आता रोज हजारो विद्यार्थ्यांच्या जेवणाचं काय ?