Border-Gavaskar Trophy 2024/25 :- गेल्या काही महिन्यापासून धावासाठी झगडणारा लोकेश राहुल, ऑस्ट्रेलियाच्या वेगवान खेळपट्ट्यावर दमदार कामगिरी करू शकतो, अशी आशा माजी क्रिकेटपटू सुनील गावस्कर यांनी व्यक्त केली.

भारताचा नियमित कसोटी कर्णधार, रोहित शर्मा पहिल्या कसोटीमध्ये खेळणार नसल्याने यशस्वी जैस्वाल सोबत अभिमन्यू ईश्वरन व अनुभवी लोकेश राहुल असे दोन पर्याय भारताकडे आहेत. मात्र, ईश्वरन ऐवजी लोकेश राहुलला अंतिम संघात घेण्यासाठी संघ व्यवस्थापन उत्सुक असेल. लोकेश राहुलकडे कसोटी क्रिकेटचा पर्याप्त अनुभव असल्याने लोकेश अंतिम ११ मध्ये खेळण्याची शक्यता आहे.

राहुल संदर्भात बोलताना गावस्कर म्हणाले, संघ व्यवस्थापन नक्कीच राहुलला अंतिम ११ मध्ये खेळविण्याचा विचार करत असणार आहे. राहुलने भारतीय संघासाठी यापूर्वी देखील सलामीवीराची भूमिका निभावली आहे. गेल्या वर्षी त्याने सेंच्युरियन मैदानावर खेळताना संस्मरणीय शतकी खेळी केली होती. ते पुढे म्हणाले की, ते शतक त्याने केलेल्या शतकामध्ये सर्वाधिक चांगले होते. त्यामुळे पुन्हा अशा प्रकारची खेळी करणे, त्याच्यासाठी मोठी गोष्ट नाही. त्याला थोडी नशीबाची साथ मिळाली तर तो नक्कीच भारतासाठी चांगली सलामी देऊ शकेल, असा विश्वास त्यांनी बोलताना व्यक्त केला.

Border-Gavaskar Trophy 2024/25 : ऑस्ट्रेलियासाठी ‘हे’ दोन भारतीय खेळाडू ठरलील त्रासदायक, रवी शास्त्रींनी केलं भाकीत…

जडेजा, अश्विन सक्षम गोलंदाज…

ऑस्ट्रेलियातील उसळत्या खेळपट्ट्यांवर चौथा गोलंदाज म्हणून नितीशकुमार रेड्डीला संधी मिळू शकते. मात्र गावस्कर यांच्या मते संघाने १ फिरकी गोलंदाज खेळविण्याऐवजी, २ फिरकी गोलंदाज खेळवावेत. भारताकडे रवींद्र जडेजा व रविचंद्रन अश्विन असे भन्नाट गोलंदाज आहेत. ते म्हणाले, या लढतीसाठी भारताने सर्वोत्तम गोलंदाज निवडले तर खेळपट्टी कशीही असली तरी काही फरक पडत नाही. अश्विन आणि जडेजाने जवळपास ९०० पेक्षा अधिक बळी टिपले आहेत. त्याबरोबरीने त्या दोघांनी शतके देखील झळकावली आहेत. खेळपट्टीवरून जास्त मदत मिळाली नाही तरी देखील ते आपल्या कौश्यल्याने व अनुभवाच्या जोरावर समोरच्या फलंदाजांवर दडपण आणण्यासाठी सक्षम आहेत.