Border-Gavaskar Trophy 2024/25 : बॉर्डर-गावस्कर ट्रॉफी 2024 येत्या 22 नोव्हेंबरपासून सुरू होणार आहे, परंतु त्यापूर्वी, तयारी करण्यासाठी भारतीय संघाने सराव सामना खेळला आहे. भारत विरुद्ध भारत-अ सामन्यात केएल राहुलला दुखापत झाली होती, त्यामुळे त्याला रिटायर्ड हर्ट होऊन पॅव्हेलियनमध्ये परतावे लागले होते. आता भारतीय चाहत्यांसाठी आनंदाची बातमी म्हणजे पर्थ कसोटी सुरू होण्याच्या पाच दिवस आधीपासून राहुलने पुन्हा नेटमध्ये सराव सुरू केला आहे.

या सिम्युलेशन मॅचच्या दुसऱ्या दिवशी राहुल दुखापतीमुळे मैदानात आला नव्हता, पण रेव्ह स्पोर्ट्सने दिलेल्या वृत्तानुसार तिसऱ्या दिवसाच्या सुरुवातीला तो नेटमध्ये घाम गाळताना दिसला. रोहित शर्मा नुकताच दुस-यांदा पिता झाला असल्याने त्याला पहिल्या कसोटी सामन्याला मुकावे लागू शकते. अशा परिस्थितीत रोहितचा पर्याय म्हणून राहुलकडे पाहिले जात आहे. आणि पर्थ कसोटीत तो यशस्वी जैस्वालसोबत डावाची सुरुवात करताना दिसू शकतो. एकीकडे राहुलच्या पुनरागमनाची चांगली बातमी आहे, तर दुसरीकडे शुभमन गिलच्या डाव्या अंगठ्याला फ्रॅक्चर झाल्याने टीम इंडियाच्या अडचणी वाढल्या आहेत. या दुखापतीमुळे त्याला पहिल्या कसोटीला मुकावे लागू शकते.

शुभमन गिलही आहे दुखापतग्रस्त…

सामन्याच्या दुसऱ्या दिवशी क्षेत्ररक्षण करताना शुभमन गिलला दुखापत झाली होती. तो मैदानावर वेदनेने ओरडताना दिसला आणि तो तत्काळ तपासणीसाठी मैदानाबाहेर गेला. पीटीआयने एक अहवाल प्रसिद्ध केला होता की, गिलच्या अंगठ्याला खरोखर फ्रॅक्चर झाले आहे आणि पहिल्या कसोटी सामन्यापूर्वी तो पूर्णपणे तंदुरुस्त होणे जवळजवळ अशक्य आहे.

Border-Gavaskar Trophy 2024/25 : विराट ते अश्विन…! भारतीय दिग्गजांना अनेक ऐतिहासिक विक्रम करण्याची संधी…

कर्णधार व सलामीवीर रोहित पहिल्या कसोटीला मुकण्याची शक्यता आहे. त्यामुळे राहुल यशस्वी जैस्वालसोबत ओपनिंग करताना दिसणार आहे. जर गिल तंदुरुस्त नसेल तर त्याच्या जागी अभिमन्यू ईश्वरन किंवा देवदत्त पडिक्कल यांना पदार्पणाची संधी दिली जाऊ शकते.